Mayın 30-da bir neçə vətəndaşın bank kartlarından ümumilikdə 3 min manata yaxın vəsait oğurlanıb. Bu barədə məlumat Daxili İşlər Nazirliyindən verilib.

Bildirilib ki, vətəndaşların bank kartlarının üzərindəki CVV/CVC kodlarını və SMS vasitəsilə göndərilən birdəfəlik OTP şifrələrini naməlum şəxslərlə paylaşmaları nəticəsində onların hesablarından müxtəlif məbləğlərdə – 725, 550, 450, 447, 300, 204, 73, 72, 60, 50 manat və 49 ABŞ dolları vəsait oğurlanıb.

Qeyd olunub ki, bu cür hallarda yalnız vətəndaşların kartlarında olan məbləğ deyil, həm də kredit limitləri hesabına onlara maddi ziyan vurulur.

Daxili İşlər Nazirliyi bir daha vətəndaşlara xəbərdarlıq edib ki, heç bir halda bank və ya digər qurumlar adından edilən zənglərə, mesajlara və linklərə inanmamalı, kartların arxa hissəsindəki CVV/CVC kodlarını və OTP şifrələrini paylaşmamalıdırlar. Xüsusilə, “hesabınız dondurulub”, “qazandınız”, “viza üçün ödənişlər” kimi mesajlar kiberfırıldaqçılıq məqsədi daşıyır.

Vətəndaşlar bu cür hallarla rastlaşdıqda dərhal “102” xidmətinə və ya ərazi polis orqanlarına məlumat verməlidirlər. DİN-in məlumatında qeyd edilib ki, kibercinayətkarlıqla mübarizə tədbirləri davam etdirilir.

Bununla belə, banklardan vətəndaşların hesablarından oğurlanan vəsaitlərin məsuliyyəti daşınmır. Bu isə ictimaiyyətdə haqlı suallar doğurur: Kartlardan pullar oğurlayanlar yalnız kiber cinayətkarlar deyilmi? Əgər belədirsə, bu cinayətkarların tutulması və cəzalandırılması üçün xüsusi proqramlar və dövlət orqanları mövcuddur. Əgər onlar tutulmursa, bu, aidiyyəti qurumların, eləcə də bankların məsuliyyətini gündəmə gətirir və ictimaiyyətdə narahatlıq doğurur.