Sosial şəbəkələr vasitəsilə vətəndaşların pul vəsaitlərini kiber üsullarla talayan dəstənin üzvləri saxlanılıblar. Bu barədə avqustun 29-da Daxili İşlər Nazirliyinin yaydığı məlumatda deyilir.

Bu sahədə müşahidə edilən əsas hüquqazidd hallardan biri “kreditlə qızıl satılır” başlığı altında, xüsusilə TikTok sosial şəbəkəsində yerləşdirilən şirnikləndirici elanlarla vətəndaşların aldadılmasıdır.

Bu tipli talama əməllərində şübhəli bilinən növbəti şəbəkənin üzvləri, əvvəllər məhkum olunmuş Elvin Həsənov, Loğman Zayidov və Ceyhun Kərimov saxlanılıblar.

Bu şəxslərin feyk səhifə və profillərində talamaya məruz qalan şəxslərin dairəsi müəyyən edilib və qrupun bütün qanunsuz fəaliyyəti aşkarlanıb. Saxlanılan şəxslərin vətəndaşların müxtəlif məbləğlərdə pul vəsaitlərini onlayn köçürmə yolu ilə mənimsədikləri müəyyən edilib. Dəstə üzvləri izi itirməkdən ötrü “kreditlə qızıl” almaq üçün onlara pul köçürən şəxslərin hesablarını sonradan bloklayaraq vəsaitləri şəxsi hesablara köçürərək nağdlaşdırıblar.

Saxlanılan dəstə üzvləri ifadələrində sosial şəbəkələrdə törətdikləri bu qanunsuz əməllərilə 150-dən çox adama maddi ziyan vurduqlarını etiraf ediblər.

Digər əməliyyatda isə paytaxt ərazisində ayrı-ayrı vətəndaşlara məxsus bank kartlarından müxtəlif məbləğlərdə pul oğurlayan Kənan Bədirli saxlanılıb. O, pul vəsaitlərini onlayn yolla öz hesabına transfer edərək silsilə oğurluqlar törədib. Hazırda saxlanılan şəxslərin barəsində araşdırmalar davam etdirilir.

Elvin Həsənov, Loğman Zayidov, Ceyhun Kərimov və Kənan Bədirlinin qanunsuz əməllərindən zərər çəkən başqa vətəndaşlar varsa, Daxili İşlər Nazirliyinə müraciət edə bilərlər.