Fransa məhkəməsi azərbaycanlı siyasi mühacir və bloger Məhəmməd Mirzəliyə qarşı sui-qəsd hazırlığında ittiham olunan Xəyyam Haqverdiyevi 10 il müddətinə azadlıqdan məhrum edib. Məhkəmə qərarı iyunun əvvəlində elan olunub.

İstintaq zamanı məlum olub ki, Xəyyam Haqverdiyev Moldaviya pasportu ilə 2021-ci ildə Fransaya gəlib və Nant şəhərində Məhəmməd Mirzəliyə qarşı həyata keçirilmiş silahlı hücumda birbaşa iştirak edib. O, qəsdən adam öldürməyə cəhd, cinayətkar dəstə ilə əməkdaşlıq və qanunsuz silah saxlama ittihamları üzrə məhkum olunub.

Qeyd edək ki, hücum 2021-ci ilin 15 martında baş verib. Silahlı və maskalı şəxslər Mirzəliyə küçədə hücum edərək onu ağır bədən xəsarətləri ilə xəstəxanalıq etmişdilər. İddialara görə, hücum zamanı 7-8 nəfər iştirak edib və məqsəd Mirzəlinin başını kəsmək olub.

Fransa məhkəməsinin qərarında vurğulanıb ki, Məhəmməd Mirzəli siyasi fəaliyyəti və sosial şəbəkələrdəki çıxışlarına görə sui-qəsdə məruz qalıb.

Bu, Mirzəliyə qarşı ilk hücum deyil. 6 oktyabr 2020-ci ildə Nant şəhərində o, silahlı hücuma məruz qalmış, ona dörd güllə atılmışdı. Güllələrdən biri Mirzəliyə yüngül xəsarət yetirmişdi. 2022-ci ildə isə Fransa hüquq-mühafizə orqanları onu öldürmək məqsədilə ölkəyə gəlmiş bir muzdlu qatili saxlamışdı.

Hücumlarla bağlı 9 nəfərin işi Ağır Cinayətlər Məhkəməsinə göndərilib. Proseslər zamanı onların sifarişlə hərəkət etdikləri ehtimalı istintaqın əsas istiqamətlərindən biri olub. Lakin bu şəxslərin Azərbaycanla birbaşa əlaqələri barədə rəsmi təsdiqlənmiş məlumat verilməyib.

Məhkəmə hökmünü şərh edən Məhəmməd Mirzəli bunu hüquq və ədalətin təntənəsi adlandırıb:
“Bu hökm azad sözə və siyasi fikrə qarşı zorakılığı təşviq edənlərə verilmiş cavabdır. Bu, təkcə mənim deyil, bütün mühacir fəalların hüquqlarının qorunması baxımından önəmlidir.”

Qeyd edək ki, bu gün Bakıda Məhəmməd Mirzəli və digər mühacirlər barəsində də qiyabi həbs qərarı çıxarılıb. Bu qərar mühacirlərə qarşı təzyiqlərin davam etdiyini bir daha göstərir.

Fransa məhkəməsinin bu qərarı isə siyasi motivli hücumlara qarşı beynəlxalq hüququn qətiyyətli mövqeyini ortaya qoyur.