“Toplum TV işi” üzrə həbsdə olan Demokratik Təşəbbüslər İnstitutunun əməkdaşı Əli Zeynal saxlandığı Bakı İstintaq Təcridxanasındakı şəraitlə bağlı ictimaiyyətə məlumat verdiyi üçün təhdid olunduğunu bildirib.

Bu barədə Əli Zeynal iyunun 5-də telefon danışığı zamanı yaxınlarına məlumat verib. Onun sözlərinə görə, təcridxana rəhbərliyi əvvəlki zəng imkanını məhdudlaşdırıb və bu qərarın səbəbi kimi onun Ədliyyə naziri Fərid Əhmədova ünvanladığı açıq məktub və təcridxanadakı vəziyyəti ictimailəşdirməsi göstərilib.

Əli Zeynal deyib ki, ona açıq şəkildə bildirilib: əgər təcridxanadakı vəziyyət barədə danışmağa davam etsə, nəticələr “daha pis olacaq”. O, məktubunda saxlanma şəraitinin ağır olduğunu, kanalizasiya sularının axdığını və siçanların kamerada dolaşdığını qeyd etmişdi.

Ə.Zeynalın vəkili Rəsul Cəfərov məsələ ilə bağlı Penitensiar Xidmətə rəsmi müraciət göndəriləcəyini bildirib.

Xatırladaq ki, “Toplum TV işi” üzrə ümumilikdə 10 nəfərə qarşı cinayət işi açılıb. Həbs edilənlər arasında “Toplum TV”nin həmtəsisçisi Ələsgər Məmmədli, jurnalistlər Müşfiq Cabbar və Fərid İsmayılov, “Demokratik Təşəbbüslər İnstitutu”nun rəhbəri və “III Respublika Platforması“nın spikeri Akif Qurbanov, qurumun əməkdaşları Əli Zeynal, Ramil Babayev, İlkin Əmrahov, eləcə də platformanın üzvü Ruslan İzzətli yer alır.

Jurnalist Elmir Abbasov barəsində polis nəzarəti qətimkan tədbiri seçilib, Şahnaz Bəylərqızı isə ev dustaqlığına buraxılıb.

İstintaqın əvvəlində saxlanılan şəxslər qaçaqmalçılıqda ittiham olunurdular. Sonradan ittihamlar ağırlaşdırılıb. Təqsirləndirilən şəxslər ittihamları qəbul etmir və siyasi motivli həbslə üzləşdiklərini bildirirlər.

Qarşı tərəfin mövqeyini dərc etməyə hazırıq.