Milli Məclisdə “Elektroenergetika haqqında” qanuna təklif olunan dəyişikliklər cəmiyyətdə ciddi müzakirələrə səbəb olub. İyunun 10-da keçirilən iclasda qaz və elektrik enerjisi üçün sabit tarifin tətbiq olunması təklifi irəli sürülüb.

Energetika nazirinin müavini Samir Vəliyev bildirib ki, yeni mexanizmə əsasən, istifadəçi yaşayışdan asılı olmayaraq müəyyən sabit ödənişi həyata keçirməlidir:
“Transformator məntəqəsi istənilən halda qurulmalıdır. Yeni yanaşmaya görə, binada yaşamayan mənzillərin sahibləri də sabit tarif ödəyəcək. Bu, ümumi xərclərin ədalətli paylaşımına xidmət edəcək”.

Sözügedən təklif ictimaiyyətdə və ekspert dairələrində narazılıqla qarşılanıb. REAL Partiyasının sədri, iqtisadçı Natiq Cəfərli məsələyə sosial şəbəkədə münasibət bildirərək, qərarın iqtisadi əsaslarının zəif olduğunu deyib:
“Hökumət vətəndaşları yükləmək üçün ‘kreativ’ yollar axtarır. Məntiqsiz və iqtisadi baxımdan zəif arqumentlərlə insanlardan əlavə vəsait toplamağa çalışırlar”, – deyə Cəfərli qeyd edib.

O, əlavə edib ki, əgər vətəndaş mənzildə yaşamırsa və enerji istifadə etmirsə, ona ödəniş tətbiq olunması hüquqi və iqtisadi baxımdan əsaslandırıla bilməz:
“Bu yanaşma vətəndaşın seçimini nəzərə almır. Dövlət infrastruktur layihələrini büdcə hesabına – yəni xalqın verdiyi vergilərlə həyata keçirir. İndi vətəndaş həm vergi ödəyir, həm də istifadə etmədiyi resurs üçün aylıq ödənişə cəlb olunur. Bəs xidmət göstərilmədiyi vaxtlarda dövlət şirkətləri vətəndaşa kompensasiya ödəyəcəkmi?”

Hazırda müvafiq qanun layihəsi parlamentdə müzakirə mərhələsindədir. İctimai rəyin və ekspert fikirlərinin nəzərə alınıb-alınmayacağı isə hələlik məlum deyil.