19 iyun 2025-ci il, Kahramanmaraş (Türkiyə) — Türkiyənin Kahramanmaraş şəhərində salınmış “Azərbaycan” məhəlləsinin rəsmi açılış mərasimi keçirilib. Tədbirdə Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan iştirak ediblər.

Açılış mərasimi 2023-cü ildə baş verən dağıdıcı zəlzələdən sonra yenidənqurma və qardaşlıq layihəsi çərçivəsində həyata keçirilmiş humanitar təşəbbüsün rəmzi sayılır. “Azərbaycan” məhəlləsi Azərbaycan dövləti və xalqının Türkiyəyə verdiyi dəstəyin davamı olaraq inşa edilib.

Mərasimdə çıxış edən Prezident İlham Əliyev vurğulayıb ki, Azərbaycan zəlzələnin ilk günlərindən etibarən Türkiyənin yanında olub: “Bizim qardaşlığımız sözlə yox, əməllə sübut olunub. Kahramanmaraşda salınan bu məhəllə həm humanitar dəstəyin, həm də iki xalq arasındakı əbədi birliyin göstəricisidir.”

Prezident Rəcəb Tayyib Ərdoğan isə öz çıxışında Azərbaycan dövlətinə və xalqına təşəkkürünü bildirib: “Azərbaycanlı qardaşlarımız bir millət, iki dövlət olduğumuzu bir daha göstərdilər. Bu məhəllə həm də gələcək nəsillərə dostluğumuzun izini qoyacaq.”

“Azərbaycan” məhəlləsində nə var?

Yeni salınmış “Azərbaycan” məhəlləsində:
• 500-dən çox ailə üçün yaşayış binaları
• Məktəb, uşaq bağçası və tibb məntəqəsi
• İctimai park və mədəniyyət mərkəzi
• “Qarabağ” adlı uşaq oyun kompleksi

yer alır. Məhəllənin girişində Azərbaycan və Türkiyə bayraqları yanaşı dalğalanır, mərkəzi meydanda isə “Qardaşlıq abidəsi” ucaldılıb.