Məhkəmə Ülviyyə Əlinin də apellyasiya şikayətini təmin etməyib. Jurnalistin həbs müddətinin daha 3 ay uzadılmasına dair qərar qüvvədə saxlanıldı

İyulun 8-də Bakı Apellyasiya Məhkəməsində “Meydan TV işi” üzrə həbs olunan jurnalist Ülviyyə Əlinin (Quliyeva) həbs qətimkan tədbirinin uzadılmasına dair verilmiş apellyasiya şikayətinə baxılıb. Proses hakim Qədim Babayevin sədrliyi ilə keçirilib. Məhkəmə vəsatəti təmin etməyərək, birinci instansiya məhkəməsinin qərarını qüvvədə saxlayıb.

Qeyd edək ki, iyunun 24-də “Meydan TV işi” üzrə saxlanılan bir qrup jurnalist və ictimai fəalın həbs müddəti daha 3 ay uzadılıb. Bu qərar Aynur Elgünəş (Qənbərova), Aytac Tapdıq (Əhmədova), Ramin Deko (Cəbrayılzadə), Aysel Umudova, Xəyalə Ağayeva, Natiq Cavadlı, Şəmşad Ağa (Ağayev), Fatimə Mövlamlı, Ülviyyə Əli, Nurlan Libre (Qəhrəmanov) və vətəndaş cəmiyyətinin üzvü Ülvi Tahirov barəsində çıxarılıb. Onların hamısı bu qərardan apellyasiya şikayəti verib.

Lakin iyul ayı ərzində keçirilən apellyasiya proseslərində şikayətlər bir-birinin ardınca rədd edilib:
• İyulun 2-də: Nurlan Libre və Xəyalə Ağayeva
• İyulun 3-də: Natiq Cavadlı
• İyulun 4-də: Aynur Elgünəş (hakim Ramin Qaraqurbanlı), Aytac Tapdıq (hakim Anar İbrahimov), Şəmşad Ağa (hakim Qədim Babayev), Fatimə Mövlamlı (hakim Ramin Qaraqurbanlı)
• İyulun 7-də: Aysel Umudova (hakim Qədim Babayev)
• İyulun 8-də: Ülviyyə Əli (hakim Qədim Babayev)

Meydan TV işi – geniş miqyaslı həbslər

2024-cü il dekabrın 6-da Meydan TV-nin əməkdaşları – Ramin Cəbrayılzadə (Deko), Aynur Qənbərova (Elgünəş), Aytac Əhmədova (Tapdıq), Aysel Umudova, Xəyalə Ağayeva, Natiq Cavadlı saxlanılıb. Onlara qarşı Cinayət Məcəlləsinin 206.3.2-ci maddəsi – qaçaqmalçılıq (əvvəlcədən əlbir olan bir qrup şəxs tərəfindən törədildikdə) ilə ittiham irəli sürülüb. Məhkəmə onların barəsində həbs qətimkan tədbiri seçib.

Həmin gün Meydan TV ilə əlaqəsi olmayan, lakin müstəqil ictimai fəal kimi tanınan Ülvi Tahirov da saxlanılıb və o da eyni ittihamla həbs olunub.

Bundan sonra 2025-ci ilin fevralında həbslər davam edib:
• Fevralın 5-də: “arqument.az” saytının baş redaktoru və Meydan TV ilə əməkdaşlıq edən jurnalist Şəmşad Ağa (Ağayev)
• Fevralın 20-də: jurnalist Nurlan Libre (Qəhrəmanlı)
• Fevralın 28-də: jurnalist Fatimə Mövlamlı
• Mayın 7-də: jurnalist Ülviyyə Əli (Quliyeva)

Həbs edilən jurnalistlərin hamısı Meydan TV və onun fəaliyyəti ilə əlaqəli cinayət işi çərçivəsində saxlanılıb.

İddialar və mövqelər

Həbs olunan jurnalistlər ittihamları qəti şəkildə rədd edir və həbslərin onların tənqidi jurnalistika fəaliyyəti ilə bağlı olduğunu bildirirlər. Müdafiə tərəfinin açıqlamalarına görə, ittihamlar sübuta yetirilməyib və hüquqi prosedurlar şəffaf şəkildə aparılmır.

Hazırda ölkədə bu iş də daxil olmaqla, oxşar ittihamlarla təxminən 30 jurnalist və ictimai fəal həbsdə saxlanılır. Onlar barələrində irəli sürülmüş ittihamların əsassız olduğunu, həbslərin isə peşə fəaliyyətləri ilə bağlı olduğunu bildirirlər.

Rəsmi qurumlar isə bildirirlər ki, ölkədə siyasi motivli həbslər yoxdur və hüquq-mühafizə orqanlarının fəaliyyəti qanunvericiliyə uyğun aparılır.

Beynəlxalq reaksiyalar

Meydan TV işi ilə bağlı həbslər beynəlxalq diqqətdən də yayınmayıb. Beynəlxalq insan haqları təşkilatları, o cümlədən Sərhədsiz Reportyorlar, Amnesty International, Human Rights Watch və BMT-nin aidiyyəti qurumları Azərbaycan hökumətini ifadə və media azadlığını qorumağa, həbsləri dayandırmağa və jurnalistlərin dərhal azadlığa buraxılmasına çağırıblar.

Avropa İttifaqı, ABŞ Dövlət Departamenti və digər Qərb ölkələrinin rəsmiləri də bu məsələni gündəmə gətirərək, Azərbaycan hökumətinə beynəlxalq öhdəliklərini xatırladıblar.