İyulun 16-da tanınmış repçi Əkbər Novruzlu (“Epi” səhnə adı ilə tanınır) Bakı bulvarında keçirilən rep deyişməsi zamanı səsləndirdiyi ifadələrə görə saxlanılıb və Səbail Rayon Məhkəməsinin qərarı ilə 30 sutka müddətinə azadlıqdan məhrum edilib. Məhkəmə onu İnzibati Xətalar Məcəlləsinin 206-cı (narkotik vasitələrin şəxsi istifadəyə görə saxlanması) və 510-cu (xırda xuliqanlıq) maddələri üzrə təqsirli bilib.

Repçinin həbsinə səbəb kimi bir neçə gün əvvəl keçirilən “rep battle” zamanı digər ifaçı “Paster”ə (Pərviz Quluzadə) ünvanladığı sözlər göstərilir. Sosial şəbəkələrdə yayılan videolarda “Epi”nin səhnədə belə dediyi eşidilir:
“Sənin də var idi radikal vaxtın. Vaxtında ‘Paşa Bank’a diss atıb, otur qucağına ‘Kapital Bank’ın.”

Sözləri hədəf alınan banklar — “Paşa Bank” və “Kapital Bank” — Azərbaycanda hakim elita ilə əlaqələndirilir. Jurnalist araşdırmalarına görə, “Paşa Bank” Prezident İlham Əliyevin qızlarının səhmdarı olduğu “Pasha Holding”ə, “Kapital Bank” isə eyni holdinqin — və dolayısı ilə Paşayevlər ailəsinin — nəzarətindədir.

Hadisə ilə bağlı ictimaiyyətdə narahatlıq yaranıb, bir çox sosial media istifadəçisi repçinin məhz ifadə azadlığı çərçivəsində səsləndirdiyi sözlərə görə cəzalandırıldığını iddia edir. “Epi” isə öz “Instagram” səhifəsində yayımladığı açıqlamada üzrxahlıq edib:

“Məşğul olduğumuz peşənin tərkibində bir az ədəbsizlik var. Əlbəttə ki, bilərəkdən olmayıb. Gələcək işlərimdə daha diqqətli olacağam.”

Əkbər Novruzlu 2013-cü ildən rep ifaçısı kimi fəaliyyət göstərir. Azərbaycanda repçilər və meyxanaçılar zaman-zaman səhnə çıxışları və sosial tənqid xarakterli ifalarına görə inzibati və bəzən də cinayət məsuliyyətinə cəlb ediliblər. Rəsmilər isə bu iddiaları qəbul etmir və qanunun aliliyinin təmin olunduğunu bildirirlər.