USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Həbsdə olan etnik tədqiqatçı İqbal Əbilovun kitabı nəşr olunub
Talış mədəniyyəti və dili sahəsində tədqiqatları ilə tanınan, hazırda həbsdə olan etnik tədqiqatçı İqbal Əbilovun yeni kitabı işıq üzü görüb. Bu barədə onun Hüquqlarını Müdafiə Komitəsi məlumat yayıb.
Kitab “ФРАГМЕНТЫ ТАЛЫШСКОЙ РЕЧИ I” (“Talış Nitqindən Fraqmentlər I”) adlanır və XIX əsrin ikinci yarısında şərqşünas Boris Dorn tərəfindən toplanmış, 2012-ci ildə Əbilov tərəfindən arxivlərdə aşkar edilmiş əlyazmalara əsaslanır. Tədqiqatçılar bu materialları talış dilinin şimal dialekti haqqında indiyədək məlum olan ən qədim elmi mənbələrdən biri kimi qiymətləndirirlər.
Kitabın adı məşhur fransız filosofu Roland Bartın “Sevgi nitqindən fraqmentlər” adlı əsərindən ilhamla seçilib. Nəşr İqbal Əbilovun həmtəsisçisi olduğu Talış Milli Akademiyasının “Bibliotheca Talyshica” adlı yeni elmi seriyasının ilk cildi kimi təqdim olunub. Seriyanın məqsədi həm tarixi, həm də çağdaş dövrdə yazılmış, lakin bu günə qədər nəşr olunmamış talış dilində elmi irsi akademik dairələrə çatdırmaqdır.
Hazırda həbs həyatı yaşayan İqbal Əbilov 2024-cü il iyulun 22-də Azərbaycana səfəri zamanı saxlanılıb. O, Ermənistanın xüsusi xidmət orqanları ilə əməkdaşlıqda və Azərbaycanda milli zəmində nifaq yaratmaq cəhdində ittiham olunur. Əbilova qarşı Azərbaycan Respublikası Cinayət Məcəlləsinin 274-cü (dövlətə xəyanət), 281.3-cü (dövlət əleyhinə yönələn açıq çağırışlar) və 283.1-ci (milli, irqi və dini nifrətin yayılması) maddələri ilə cinayət işi açılıb.
Bu ilin mayında Lənkəran Ağır Cinayətlər Məhkəməsi onun barəsində 18 il azadlıqdan məhrumetmə hökmü çıxarıb.
