Böyük Britaniyada vəkil Rori Fordays Azərbaycanın sabiq milli təhlükəsizlik naziri Eldar Mahmudovun ailəsi ilə əlaqəli maliyyə vəsaitlərini yoxlayarkən səhlənkarlığa yol verdiyinə görə cərimələnib.

Mütəşəkkil Cinayətkarlıq və Korrupsiyaya Qarşı Mübarizə Layihəsinin (OCCRP) məlumatına əsasən, Britaniyanın Vəkillərin İntizam Tribunalı (SDT) Fordaysı 32,500 funt-sterlinq (təxminən 42,000 ABŞ dolları) məbləğində cərimələyib və onu beş il müddətinə hüquqi idarəetmə və müvafiq vəzifələrdə işləmək hüququndan məhrum edib.

Tribunal vəkilin Eldar Mahmudovun oğlu Anar Mahmudovla bağlı iri məbləğli maliyyə əməliyyatlarında “ibtidai və sadəlövh” yoxlamalar apardığını bildirib. Məlum olub ki, Fordays 2013–2015-ci illərdə “Taylor Fordyce” hüquq firmasının direktoru olduğu dövrdə Mahmudov ailəsi ilə əlaqəli iki böyük köçürməni müştəri hesabına qəbul edib.

Bu vəsaitlərdən biri – 2015-ci ilin aprelində daxil olan 1.9 milyon funt-sterlinq – Cənubi İngiltərədə yerləşən kommersiya əmlakının alınmasına yönəldilib. Əmlakın alıcısı ofşor zonada – St. Kitts və Nevisdə qeydiyyatdan keçmiş “Continental Properties Limited” adlı şirkət olub. Bu şirkətin benefisiar sahibləri isə ictimaiyyətə açıqlanmayıb.

Əmlaka “Pizza Hut”, “Greggs”, tədris mərkəzi və “Salvation Army”in mağazası kimi obyektlər daxil idi. “Continental Properties” şirkəti həmin əmlakı iyulun əvvəlinədək əlində saxlayıb.

Fordays tənzimləyici orqanlara bildirib ki, əmlakın sahibi Anar Mahmudovun təsis etdiyi “Continental Trust” şirkətidir, lakin Mahmudov özü nə direktor, nə səhmdar, nə də benefisiar kimi görünmür. Tribunal isə əmlak alqı-satqısında istifadə edilən vəsaitlərin Anar Mahmudovun bacısı Nərgiz Mahmudovaya məxsus olduğunu müəyyən edib.

SDT Fordaysın təqdim olunan “ziddiyyətli” məlumatlara həddindən artıq güvəndiyini və əlavə araşdırma aparmaq əvəzinə, əməliyyatı tənzimləyici öhdəliklərindən üstün tutduğunu bildirib.

Korrupsiyaya qarşı mübarizə təşkilatlarının nümayəndələri bu hadisəni Britaniyada – xüsusilə daşınmaz əmlak bazarında – Azərbaycanla əlaqəli şübhəli sərvətlərin izini sürmək üçün təcili araşdırmalara çağırış kimi qiymətləndirib.

Xatırladaq ki, Eldar Mahmudov 2015-ci ilin oktyabrında vəzifəsindən azad edilib. Ardınca MTN-də aparılan istintaq nəticəsində nazirliyin 21 əməkdaşı cinayət məsuliyyətinə cəlb olunub. MTN 2015-ci ilin dekabrında ləğv edilib və onun bazasında Dövlət Təhlükəsizliyi Xidməti ilə Xarici Kəşfiyyat Xidməti yaradılıb.