Bu gün Demokratik Təşəbbüslər İnstitutunun (İDİ) rəhbəri və III Respublika Platformasının spikeri Akif Qurbanov 44-cü doğum gününü həbsdə qarşılayır. Bu, onun ardıcıl olaraq ikinci doğum günüdür ki, azadlıqdan məhrum şəraitdə keçirir.

Akif Qurbanov 2024-cü il martın 6-da hüquq-mühafizə orqanlarının III Respublika Platformasının Bakıdakı ofisinə keçirdiyi reyd zamanı saxlanılıb. O, valyuta qaçaqmalçılığı, qanunsuz sahibkarlıq, vergi ödəməkdən yayınma və çirkli pulların yuyulması kimi bir sıra ağır maliyyə cinayətlərində ittiham olunur. Lakin Qurbanov bu ittihamları rədd edir və həbsinin siyasi motivli olduğunu bəyan edir.

Məhkəmə proseslərində o, İDİ-nin məqsədinin gənclərin hüquq və media sahəsində maarifləndirilməsi olduğunu vurğulayıb. Qurbanov bildirib ki, bu fəaliyyətinə görə o və ailə üzvləri təzyiqlərə məruz qalıb. O, həmçinin ifadəsində Dövlət Təhlükəsizliyi Xidmətindən (DTX) əməkdaşlıq təklifi aldığını, lakin bu təklifi rədd etdiyini açıqlayıb:

“DTX ilə görüşdə mənə bildirildi ki, İDİ Prezident Administrasiyası tərəfindən ciddi şəkildə izlənilir. Mənə birgə fəaliyyət təklif olundu, lakin bu, etik prinsiplərimizlə uyğun gəlmədiyi üçün qəti şəkildə rədd etdim. Mən dövlətimi sevirəm, amma sizin təmsil etdiyiniz rejimlə dövlət arasında bərabərlik işarəsi qoya bilmərəm. Biz hüquq və institusiyalara əsaslanan dövlət anlayışını müdafiə edirik. Dövlət bir ailənin mülkiyyəti ola bilməz.”

Qurbanovun “özünüzü təqsirli bilirsinizmi?” sualına cavabını tam ifadə etməsi üçün 3 məhkəmə iclası tələb olunub.

Beynəlxalq insan hüquqları təşkilatları Akif Qurbanovun və digər “Toplum” üzvlərinin dərhal azadlığa buraxılmasını tələb edirlər. Onların fikrincə, bu həbslər Azərbaycanda müstəqil media və vətəndaş cəmiyyətinə qarşı sistemli repressiyanın bir hissəsidir.

Akif Qurbanov kimdir?

Akif Qurbanov 3 avqust 1981-ci ildə Gürcüstanda anadan olub. 1998-ci ildə Bakı şəhərindəki 289 saylı Zəngi liseyini bitirib. Daha sonra Azərbaycan Tibb Universitetində təhsil alıb. Gənclik illərində Ümid Partiyasında fəaliyyət göstərib və partiyanın Seçki Qərargahına rəhbərlik edib.

2006-2016-cı illərdə Mərkəzi Seçki Komissiyasının üzvü olan Qurbanov, 2008-ci ildə Strasburqda Avropa Şurası yanında Siyasət Məktəbində, 2013-2016-cı illərdə isə Xarkov Milli Universitetinin hüquq fakültəsində təhsilini davam etdirib. 2013-cü ildən bəri rəhbəri olduğu İDİ vasitəsilə yüzlərlə gəncin maarifləndirilməsinə və ictimai fəallığa təşviqinə töhfə verib.

Hazırda isə o, ictimai fəaliyyətinin bədəlini azadlığından məhrum edilərək ödəyir.