Azərbaycan Xalq Cəbhəsi Partiyasının (AXCP) həbsdə olan üzvü Sahib Məmmədzadədən artıq 5 gündür ki, heç bir xəbər yoxdur. Bu barədə onun ailə üzvləri məlumat veriblər.

Onların sözlərinə görə, AXCP-nin Daşkəsən rayon şöbəsinin sədri olan Məmmədzadə 5 gün əvvəl saxlanıldığı Umbakı cəzaçəkmə müəssisəsindən naməlum istiqamətə aparılıb və indiyə qədər onun harada olduğu barədə ailəsinə heç bir rəsmi məlumat verilməyib.

Siyasi fəalın bacısı bildirib ki, ailə üzvləri, xüsusilə şəkərli diabetdən əziyyət çəkən atası və ürək əməliyyatı keçirmiş anası onun yoxa çıxması ilə bağlı ciddi narahatlıq keçirirlər:

“Biz Ədliyyə Nazirliyinin Penitensiar Xidmətindən tələb edirik ki, qardaşımın harada saxlanıldığı barədə dərhal məlumat verilsin və ailəsi ilə telefon əlaqəsi təmin olunsun. Mən beynəlxalq təşkilatlara da müraciət edirəm: bizə kömək edin!”

Hazırda Penitensiar Xidmət məsələ ilə bağlı ictimaiyyətə heç bir açıqlama verməyib.

Sahib Məmmədzadə 2024-cü ilin martında narkotik ittihamı ilə saxlanılıb və dekabr ayında Gəncə Ağır Cinayətlər Məhkəməsi tərəfindən 6 il 6 ay azadlıqdan məhrum edilib. Bu ilin martında isə apellyasiya məhkəməsi cəzanı 3 il 6 aya endirib. AXCP üzvü özünü təqsirli hesab etmir və ittihamların siyasi motivli olduğunu bildirir.

Məmmədzadə əvvəllər də hüquq-mühafizə orqanlarının təzyiqləri ilə üzləşib. 2023-cü ildə Xoşbulaq kənd sakinlərinin torpaq bölgüsü ilə bağlı etirazları zamanı o, rayon polis şöbəsinə çağırılmışdı.

AXCP-nin məlumatına görə, hazırda partiyanın 20-yə yaxın üzvü müxtəlif ittihamlarla həbsdə saxlanılır. Partiya bu həbslərin siyasi baxışlarla əlaqəli olduğunu bildirir. Hökumət isə ölkədə siyasi məhbusların olmadığını iddia edir.