ABŞ Dövlət Departamenti 2024-cü ildə dünya ölkələrində insan haqlarının vəziyyətinə dair illik hesabatını açıqlayıb. Sənədin Azərbaycana aid hissəsində bildirilir ki, ölkədə insan haqları sahəsində ötən illərlə müqayisədə əsaslı dəyişiklik qeydə alınmayıb.

Hesabatda qeyd olunur ki, 2024-cü ildə polis və həbsxana əməkdaşları tərəfindən saxlanılan şəxslərin öldürülməsi barədə məlumatlar mövcud olub. Nümunə kimi iyunun 14-də Sumqayıtda polis idarəsində Elvin İskəndərovun öldürülməsi faktına istinad edilib.

Sənəddə həmçinin “Freedom House”un Dağlıq Qarabağdan erməni əhalisinin etnik təmizlənməsi barədə, “Caucasus Heritage Watch”ın isə bölgədə erməni mədəni irsinin məhv edilməsi ilə bağlı hesabatlarına yer verilib.

Mətbuat azadlığı bölməsində Azərbaycan hökumətinin ifadə azadlığını və medianın müstəqilliyini məhdudlaşdırdığı vurğulanır. Dövlət Departamenti bildirir ki, jurnalistlər, redaktorlar və müstəqil blogerlər hədələnib, bəzən döyülüb və həbs olunub. Ölkə xaricində yaşayan media nümayəndələrinə qarşı da şübhəli zorakılıq halları qeydə alınıb. 2023-cü ilin noyabrından bəri ən azı 40 müstəqil jurnalist və vətəndaş cəmiyyəti fəalının həbs olunduğu qeyd edilir.

Hesabatda 2022-ci ildə qəbul edilən media qanununun müstəqil mətbuatın fəaliyyətini məhdudlaşdırdığı, hökumətin isə sosial media diskursunu manipulyasiya etmək üçün bot və trollardan istifadə etdiyi vurğulanıb. Beynəlxalq və yerli mənbələrə istinadən bildirilir ki, bu hesablar onlayn tənqidçiləri hədələyib, texnologiya şirkətlərinə isə məzmunun məhdudlaşdırılması üçün təzyiq göstərib.

Sənəddə işçi hüquqları sahəsində problemlərin davam etdiyi, bu mövzunu gündəmə gətirən fəalların həbs edildiyi də qeyd olunur. İşgəncə və qeyri-insani rəftar bölməsində məhbusların ailə üzvləri və vəkilləri ilə görüşünə, eləcə də tibbi yardıma çıxışına maneələrin olduğu vurğulanır.

Hesabatda həbsdə olan “Abzas Media” direktoru Ülvi Həsənlinin təcridxanada fiziki zorakılıq hallarına şahidlik etdiyi və özünün də zorakılığa məruz qaldığı barədə açıqlamalarına yer verilib.