Beynəlxalq mətbuat azadlığı təşkilatı – Jurnalistləri Müdafiə Komitəsi (CPJ), “Toplum TV”nin həbsdə olan əməkdaşı Fərid İsmayılova qarşı ölüm təhdidlərindən ciddi narahatlıq ifadə edib.

Təşkilatın Avropa və Asiya üzrə şöbəsi “X” sosial şəbəkəsində paylaşım edərək Azərbaycan hakimiyyətindən İsmayılovun təhlükəsizliyinin təmin olunmasını və o da daxil olmaqla “nahaq yerə həbs edilmiş” 25-dən çox jurnalistin azad edilməsini tələb edib.

Sentyabrın 29-da Bakı Ağır Cinayətlər Məhkəməsində keçirilən prosesdə çıxış edən Fərid İsmayılov bildirib ki, saxlandığı Bakı İstintaq Təcridxanasında yan kameradakı məhkum onu öldürməklə hədələyib.

“Toplum TV işi” üzrə ümumilikdə 10 nəfərə cinayət işi açılıb. Onların arasında III Respublika Platformasının spikeri Akif Qurbanov, quruculardan Ruslan İzzətli, “Toplum TV”nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev var.

Bundan başqa, jurnalist Elmir Abbasov polis nəzarətinə verilib, redaktor Şahnaz Bəylərqızı isə əvvəlcə ev dustaqlığına buraxılıb, daha sonra onun barəsində polis nəzarəti qətimkan tədbiri seçilib.

İstintaq orqanları əvvəlcə təqsirləndirilən şəxsləri qaçaqmalçılıqda ittiham etsə də, sonradan ittihamlar daha da ağırlaşdırılıb. Həbs edilənlər isə bütün ittihamları rədd edir və onların siyasi sifariş əsasında həbs olunduğunu bildirirlər.