Sentyabrın 29-da Bakı Ağır Cinayətlər Məhkəməsində “Müdafiə Xətti” hüquq müdafiə təşkilatının həbsdə olan direktoru Rüfət Səfərovun işi üzrə növbəti məhkəmə prosesi keçirilib.

“Azadlıq Radiosu”nun məlumatına görə, hakim Aygün Qurbanovanın sədrliyi ilə keçirilən iclasda hüquq müdafiəçisi dövlət ittihamçısının suallarını cavablandırıb və bir daha ittihamları rədd edib. O, həbsinin siyasi motivli olduğunu vurğulayıb:

“İlham Əliyev istədiyinə görə mən buradayam. Baş prokuror Kamran Əliyevin, daxili işlər naziri Vilayət Eyvazovun, Dövlət Təhlükəsizliyi Xidmətinin sədri Əli Nağıyevin repressiv siyasətini haqlı tənqid etdiyimə görə cəzalandırılmışam”, – deyə Səfərov bildirib.

Prosesdə onunla dövlət ittihamçısı arasında gərginlik yaşanıb. Səfərov keçmiş prokurorluq əməkdaşı olduğunu xatırladaraq deyib:
“Onsuz da bu ölkədə demokratiyanı, insan hüquqlarını müdafiə edən adamlar ya ‘dələduz’ olur, ya ‘xuliqan’, ya da ‘narkoman’. Mən 2015-ci ilin dekabrında prokurorluq vəsiqəmi cırıb iki yerə böldüm və dedim ki, birini Zakir Qaralova, birini də Rüstəm Usubova çatdırın. O vaxt başıma nələrin gələcəyini bilirdim, amma sistemdə qalmaq istəmədim.”

Müdafiəçi Elçin Sadıqovun suallarına cavab verən Səfərov zərərçəkmiş qismində tanınan Natiq İmamquliyevin ona 60 min manat verməsi barədə iddianı “yalan” adlandırıb:
“Şahidsiz, alqı-satqı müqaviləsi olmadan heç kim başqasına bu qədər pul verməz. Mən Natiq İmamquliyevi ilk dəfə saxlanıldığım gün qarajımda, mənə hücum edəndə görmüşəm.”

Səfərov əlavə edib ki, hadisə yerinə polisin dərhal gəlməsi onun əvvəlcədən planlaşdırılmış əməliyyat olduğuna işarədir.

Məhkəmə prosesi noyabrın 3-də davam edəcək.

Xatırladaq ki, hüquq müdafiəçisi 2023-cü il dekabrın 3-də saxlanılıb. Ona qarşı xuliqanlıq, dələduzluq və qəsdən sağlamlığa zərər vurma ittihamları irəli sürülüb. İttihamda göstərilir ki, o, torpaq alqı-satqısı adı ilə Natiq İmamquliyevdən 60 min manat alıb, daha sonra aralarında mübahisə yaranıb və Səfərov onu döyüb.

Səfərov isə bütün ittihamları rədd edir, həbsi insan hüquqları sahəsində fəaliyyətinə və tənqidlərinə görə siyasi sifariş kimi qiymətləndirir. Onun həbsindən əvvəl ABŞ-a səfəri və Dövlət Departamentindən insan hüquqları üzrə mükafat alması planlaşdırılırdı.