Xaçmaz rayonu, Yaquboba kənd sakini Füzuli Murtazayev məhkəmə qətnaməsinin icra edilməməsindən şikayətçidir. Vətəndaş Ədliyyə Naziri Fikrət Məmmədova ünvanladığı müraciətdə məsələni nəzarətə götürməyi xahiş edir.

Vətəndaşın müraciətində qeyd edilir ki, onun iddiası əsasında Bakı şəhəri, Qaradağ rayon Məhkəməsi cavabdeh Məmmədov Xudaverdi Süleyman oğluna qarşı “inzibati xəta nəticəsində əmlaka vurulmuş maddi zərərin əvəzinin ödənilməsi” ilə bağlı qətnamə çıxarıb. Hakim Günay Həşimovanın çıxardığı qətnaməyə görə, Xudaverdi Məmmədov iddiaçı tərəfə 2630 manat məbləğində təzminat ödəməlidir. Qətnamənin üzərindən bir ildən çox vaxt keçsə də, tam icra edilməmiş qalır.

Füzuli Murtazayev bu barədə Yenisabah.az-a verdiyi açıqlamada bildirib ki, 2019-cu il iyunun 28-də sonuncu məhkəmə instansiyasında da təsdiqlənmiş qətnaməyə görə, Xudaverdi Məmmədov ümumi zərərin 1191 manatını ona ödəməlidir. Yerdə qalan məbləğ isə sığorta şirkəti tərəfindən ödənilməli idi. Bununla bağlı problem yaranmadığı üçün Füzuli Murtazayev sığorta şirkətindən şikayətçi deyil. Lakin onun sözlərinə görə, Xudaverdi Məmmədov qətnaməni icradan davamlı şəkildə boyun qaçırır və məhkəmə icraçıları da onunla bağlı hər hansı tədbir görmür:

“Xüdaverdi Məmmədovun qeydiyyatda olduğu Qaradağ rayon İcra və Probasiya Şöbəsinin icra məmuru ilə dəfələrlə əlaqə saxlasaq da, qətnamənin icra edilməsi üçün heç bir tədbir görülməyib. Hətta o, karantin dövrünə qədər rahat şəkildə şəxsi avtomobili ilə Azərbaycan-Rusiya sərhədini keçib. Halbuki məlumdur ki, hər hansı bir səbəbdən borcu olan şəxslərin sərhəddən keçməsi əngəllənir. Vəziyyətdən belə anlaşılır ki, məhkəmə icraçıları bu adamı himayə edir, onun əməlini ört-basdır edib pulu ödəməməsinə şərait yaradırlar. Mən bununla bağlı Ədliyyə Nazirliyinə şikayət etmişəm”.

Bildirək ki, onun Ədliyyə Naziri Fikrət Məmmədova ünvanladığı müraciətində qeyd olunur ki, əvvəlki məktubuna cavab olaraq Nazirliyin İcra Baş İdarəsinin kredit borcları şöbəsinin aparıcı məsləhətçisi vəzifəsini icra edən Elnur Osmanlı 30 aprel 2020-ci il tarixdə rəsmi cavab yazaraq bildirib ki, cavabdeh şəxs Qaradağ Rayon İcra və Probasiya şöbəsinə dəvət edilib, izahatı alınıb və borcu ödəməkdən yayınacağı halda üzləşəcəyi məsuliyyət haqqında rəsmən məlumatlandırılıb. Amma yenə də qeyd olunan təzminat ödənmədən qalır. Bu səbəblə şikayətçi Füzuli Murtazayev Nazir Fikrət Məmmədovdan xahiş edir ki, işi nəzarətinə götürsün, dəymiş zərərin ödənilməsi üçün müvafiq tapşırıq versin.

Qeyd edək ki, məsələnin mahiyyəti ondan ibarətdir ki, cavabdeh Xudaverdi Məmmədov Yalama-Xudat yolunda idarə etdiyi nəqliyyat vasitəsilə sürət həddini aşmış, iddiaçı tərəfə aid qoyun sürüsünü vurmuşdur. Nəticədə ümumi dəyəri 2630 manat olan bir neçə qoyun ölüb, bir neçəsi də yaralanıb. Füzuli Murtazayev hadisə yerində cavabdeh şəxsə zərərin ödənilməsi və qarşılıqlı anlaşma üçün təklif etsə də o, özünü günahkar saymadığını bildirib. Nəticədə iş məhkəməyə gedib çıxıb və ayrıntılı şəkildə araşdırma aparıldıqdan sonra zərərçəkənə 2630 manat təzminat ödənilməsi ilə bağlı qətnamə çıxarılıb.