Belə də olmalıydı. Fəaliyyətə başladığı gündən yarıtmazlığı, narazılıq yaratması, nizam-intizamsızlığı ilə total şəkildə pislənən Bakı Nəqliyyat Agentliyindən dayanma-durma və parklanma qaydalarının təşkili işi tamamilə geri alınmalıydı.

Baxmayaraq ki, hələlik BNA bu işdən kənarlaşdırılmayıb, sadəcə, Bakı şəhərində dayanma-durma və parklanma qaydalarının təşkili və nəzarət mexanizminin həyata keçirilməsinə həm də Bakı şəhər Dövlət Yol Polisi də cəlb olunacaq.

Yəni, sərəncamla bu səlahiyyət Daxili İşlər Nazirliyinə, daha dəqiq desək Dövlət Yol Polisinə həvalə edilib.

Reportyor.info xəbər verir ki, bundan sonra yol polisi Bakı Nəqliyyat Agentliyi ilə birgə paytaxt ərazisində dayanma-durma və parklanmaya nəzarət edəcək.

Amma ilk gündən dayanma-durmanın DYP-dən alınıb BNA-ya verilməsi yanlış seçim idi. O baxımdan bu səlahiyyətlərin tamamilə alınaraq DYP-yə qaytarılması zamanıdır.

Çünki bu müddət ərzində BNA nə parklanma yerlərini təşkil edə bilib, nə nəqliyyat müfəttişləri doğru-düzgün işini həyata keçirirlər.

Dəfələrlə video faktlar təqdim olunub, özünü Ziya Məmmədovun qoçuları kimi aparan BNA əməkdaşlarının xəlvətcə dayanma-durma cəriməsi yazıb aradan çıxması ifşa edilib, parklanma təşkil edilməyən yerlərdə sürücülərə əsassız cərimə yazılması sübuta yetirilib. Lakin prezidentin BNA qarşısında qoyduğu tapşırıqlar yerinə yetirilmədi, etimad doğrulmadı.

Ona görə də bu sahədə böyük təcrübəyə malik olan, insafən, sürücüləri yerli-yersiz cərimələməyən, bu işi gizli, kol dibində etməyən DYP-nin posesə yenidən cəlb olunması düzgün addımdır.

Əgər bu vaxta qədər BNA parklanmanın təşkili və dayanma-durma ilə bağlı problemlərin həllinə heç bir töhfə verməyibsə, gələcəkdə də gözləməyə dəyməzdi.

Ümumiyyətlə, BNA amöb bir qurumdur və yarandığı gündən narazılıq, xaos yaratmaqla məşğuldur. İstər əvvəl, istər pandemiya dövründə BNA ictimai nəqliyyatda sıxlığın aradan qaldırılması üçün heç bir real iş görməyib.

Əslində, qurum təsis olunarkən böyük etimad göstərilmişdi, dayanma-durma ona həvalə edilmişdi, ictimai nəqliyyatda sahman yaratması, nəqliyyatın intellektual idarəetmə sisteminin işlək vəziyyətə gətirəcəyi, Ziya Məmmədovun 100 milyonluq dayanacaqlardakı monitorlarının fəaliyyət göstərəcəyi gözlənilirdi.

Ancaq bunların heç biri baş vemədi və BNA rəhbəri Vüsal Kərimli dövlətin, prezidentin ümid etdiyi layihəni batırdı.

Dayanma-durma və parklanma işinin DYP ilə birgə həyata keçirilməsinə başlanması da məhz BNA-ya olan ümidlərin puç olmasının başlanğıcıdır.

Bu gedişlə qurumun demontaj olunması, ləğvi belə istisna deyil və nəqliyyat sektorunda şəffaf, real işlər görəcək strukturun yaradılması mümkündür.

Yalnız iki halda bu səlahiyyət yalnız BNA-da qalır. Bu da sürücünün parklanma yerini ödəniş etmədən tərk etməsi və 24 saatdan artıq parklanma yerində qalmasına görə cərimələrin tətbiqidir.

Digər hallarda – qadağan olunmuş yerdə avtomobili park etmək, parklanma qaydasını pozmaq (paralel və perpendikulyar parklanma icazə verilən yerdə düzgün saxlamamaq), avtobus dayanacaqlarında maşın saxlamaq, avtobusu dayanacaqdan kənarda dayandırmaq, əlillər üçün nəzərdə tutulmuş yerdə avtomobillərin park edilməsi hər iki qurum tərəfindən nəzarətdə saxlanılacaq.

Təsadüfi deyil ki, bir müddət əvvəl Azərbaycan Dövlət Televiziyasının (AzTV) efirində yayımlanan “Nəsillərin debatı” proqramında Bakı Nəqliyyat Agentliyinin fəaliyyəti sərt tənqid edilmişdi.

Xüsusilə də Bakı kəndlərində avtobus çatışmazlığı, mövcud avtobusların yararsız vəziyyətdə olması sərnişinlərin ciddi narazılığına səbəb olur.

Bakı Nəqliyyat Agentliyinin fəaliyyəti ilə bağlı haqlı narazılıqlar çoxdur. Çünki onların fəaliyyəti qeyri-ciddi nüanslarla yadda qalır.

Əslində isə bu qurumun görməli olduğu iş nəqliyyat infrastrukturunu yaxşılaşdırmaq, vətəndaşlara daha çevik, rahat xidmətin təşkilidir.

Önəmli olan budur və Bakı Nəqliyyat Agentliyinin də fəaliyyətinin ana xətti bundan ibarət olmalıdır.

Bundan başqa, Bakı Nəqliyyat Agentliyinin tıxac və sıxlığın qarşısını almaq məqsədilə yolayrıclarında yeni nişanlanma xətti – sarı tor şəbəkənin tətbiq etməsinə gəlincə, bu da uğursuz layihələrdən biridir.

Ekspertlər qeyd edir ki, işıqforlar normal tənzimlənsə, sarı torlara ehtiyac qalmaz. Bakı Nəqliyyat Agentliyinin tərkibində olan Nəqliyyatın İntellektual İdarəetmə Mərkəzi həqiqətən də ortaya intellekt qoyub işıqforların rejimini şəhərdəki sıxlığa görə düzgün müəyyən etsə, düzgün tənzimləsə, yol polisi hər yol kəsişməsində dayanıb qayda pozanı cərimələməklə məşğul olmaz.

Təsəvvür edin, işıqforu nizamlayacaq qurum – BNA qalıb kənarda, yol polisi yolu başqa şəkildə nizamlamaq məcburiyyətindədir.

BNA yollarda belə sarı şəbəkə yaratmaqdansa, bir neçə maarifləndirici sosial çarx çəksəydi, daha yaxşı olardı. O zolağın orada olması nəyi dəyişəcəkə Bu boyda həngaməyə ehtiyac yox idi.

Ekspertlər hesab edir ki, bu qurumun fəaliyyətinə ehtiyac yoxdur. Marşrut xətləri, o cümlədən parkinq yerləri ərazi üzrə bələdiyyələrin balansına verilməli və BNA ləğv olunmalıdır.

Bu, həm də bələdiyyələrin gəlir əldə etməsinə səbəb olacaq ki, hazırda buna çox böyük ehtiyac duyulur.

Milyonların “asfalta döşənməsindənsə”, yaxud insanları narazı salan xidmətlərdənsə, bələdiyyələrin vəsait əldə edib əhaliyə xidmət göstərməsi daha məqsədəuyğun sayılmalıdır.

Yeri gəlmişkən, Bakı Nəqliyyat Agentliyi (BNA) 2020-ci ildə Bakıda piyadalar üçün 500 yeni yol nişanı quraşdıracağı ilə bağlı yayılan xəbər bir qədər müzakirəyə səbəb olmuşdu.

Belə ki maliyyə saytlarının birində bildirilirdi ki, bir yol nişanının bir ədədi dövlətə 1840 manata (1082 ABŞ dollarına) başa gələcək.

Bu məsələ Hesablama Palatası tərəfindən araşdırmaların başlanmasına səbəb olmuşdu.