Gürcüstanın Batumi şəhərində keçirilən Avropa çempionatında Azərbaycan şahmatçıları növbəti qələbələrini qazanıblar.

Qitə turnirinin VI turunda həm kişi, həm də qadınlardan ibarət komandalarımız Ermənistan millisinə qalib gəlib.

Kişi şahmatçılardan ibarət milli komanda Ermənistan yığmasını 2,5:1,5 hesabı ilə məğlub edib.
Komandamızın lideri Şəhriyar Məmmədyarov rəqibini məğlub edərək qələbə qazandırıb. Rauf Məmmədov, Eltac Səfərli və Aydın Süleymanlı isə görüşlərini heç-heçə başa vurublar. Bu nəticədən sonra Azərbaycan yığmasının aktivində 9 xal var.

Qadın şahmatçılardan ibarət komandamız da VI turda Ermənistan millisini 3:1 hesabı ilə üstələyib.
Ülviyyə Fətəliyeva və Gülnar Məmmədova qələbə qazanıb, Xanım Balacayeva və Gövhər Beydullayeva isə partiyalarını heç-heçə ilə başa vurublar. Nəticədə xanım şahmatçılarımızın xalı 8-ə yüksəlib.

Qeyd edək ki, sabah Avropa çempionatında istirahət günüdür. Turnirə oktyabrın 14-də yekun vurulacaq.