1tv.ge Dövlət Təhlükəsizlik Xidmətinə istinadən xəbər verir ki, Gürcüstanda Rusiyaya gedən bir neçə partlayıcı qurğu və külli miqdarda partlayıcı maddə olan yük saxlanılıb.

Partlayıcı maddələr yanvarın 19-da Odessadan Rumıniya, Bolqarıstan və Türkiyədən keçərək Gürcüstana çatdırılıb, Türkiyə-Gürcüstan sərhədindəki “Sarp” keçid məntəqəsindən Ukrayna vətəndaşına məxsus mikroavtobusla gətirilib.

Sonra yük “Daryal” keçid məntəqəsindən keçərək Rusiyaya, Voronejə çatmalı idi.

Partlayıcı qurğular və partlayıcı maddələr konteyner kimi istifadə edilən elektrik mühərrikli avtomobil üçün nəzərdə tutulan iki akkumulyatorda daşınıb. Onlar antiterror mərkəzinin əməkdaşları tərəfindən avtomobilə baxış zamanı aşkar edilib. Hər birində altı partlayıcı qurğu olub.

“Müəyyən edilib ki, partlayıcı qurğularda elektrik detonatoru və xüsusi taymerdən istifadə etməklə aktivləşdirilə bilən hərbi təyinatlı S-4 partlayıcı maddələr var. Partlayıcının ümumi çəkisi 14 kiloqrama çatır. Konteynerlərə 6 ədəd detonator və 6 ədəd xüsusi açar da yerləşdirilib. Aktivləşdirmə vaxtı artıq proqramlaşdırılan altı ayrı partlayıcı qurğu qutusunun hamısında eyni sayda elektron aktivləşdirmə taymerləri quraşdırılıb”, - qurumdan bildirilib.

Xidmətin məlumatına görə, partlayıcı maddələrin daşınmasında Gürcüstandan 7, Ukraynadan 3, Ermənistandan isə 2 nəfər iştirak edib.

Yükn göndərilməsini 2020-ci ildə Odessa Radasının deputatlığına “Xalqın qulluqçusu” partiyasından namizəd olmuş, əslən Batumidən olan Andrey Şaraşidze təşkil edib.