Estoniya, Latviya və Litva Avropa İttifaqını Rusiya neftinin alınmasına tam qadağa qoyulması prosesini sürətləndirməyə çağırıb.

“Financial Times”ın məlumatına görə, Baltik ölkələri hesab edir ki, Yaxın Şərqdəki gərginlik və Hörmüz boğazı ətrafında yaranmış risklərə baxmayaraq, gözlənilən enerji böhranı baş verməyib. Bu səbəbdən Brüssel Rusiya neftindən tam imtina planına yenidən qayıtmalıdır.

Baltik ölkələrinin mövqeyinə görə, Rusiya neftindən əldə olunan gəlirlər Kremlin Ukraynaya qarşı müharibəsini maliyyələşdirməsinə imkan yaradır. Onlar bildirirlər ki, Avropa İttifaqı Moskvanın enerji gəlirlərini daha da azaltmaq üçün qərarları təxirə salmamalıdır.

Məsələ iyunun 26-da keçirilən Aİ enerji nazirlərinin görüşündə də qaldırılıb. Estoniya, Latviya və Litva Avropa Komissiyasından Rusiya neftinin idxalının tam dayandırılması ilə bağlı müzakirələrdə irəliləyiş tələb edib.

Avropa İttifaqı 2027-ci ilin payızına qədər Rusiya neftindən tam imtinanı hədəfləyir. Lakin İran ətrafında baş verənlər və Hörmüz boğazında yaranan gərginlik bu prosesin ləngiməsinə səbəb olmuşdu.

Son illər Aİ Rusiyadan enerji asılılığını ciddi şəkildə azaldıb. 2022-ci ilin əvvəlində Rusiya Aİ-nin neft idxalında əsas pay sahiblərindən biri idisə, 2025-ci ildə bu göstərici cəmi 2 faizə düşüb.

Bununla belə, Macarıstan və Slovakiya kimi Rusiya enerji daşıyıcılarından daha çox asılı olan ölkələrin prosesə müqavimət göstərə biləcəyi bildirilir.

Ekspertlər hesab edirlər ki, Baltik ölkələrinin çağırışı həm Ukraynaya siyasi dəstək, həm də Rusiyanın müharibə imkanlarını məhdudlaşdırmaq baxımından Aİ daxilində yeni təzyiq dalğası yarada bilər.