Müğənnilər Vəfa Şərifova və Şəbnəm Tovuzlu arasında qalmaqal getdikcə böyüyür. Bundan başqa V.Şərifova onun yutub kanalını idarə edən Nadir adlı şəxsin Ş.Tovuzlunun tapşırığı əsasında qaçırıldığını iddia edir.

Maraqlıdır, iddia öz əksini taparsa, Ş.Tovuzlunu hansı cəza gözləyir?

Hüquqşünas Ramil Süleymanovun sözlərinə görə, əgər doğrudan da Ş.Tovuzlunun sifarişi ilə belə bir əməl kiminsə tərəfindən törədilibsə, bu, artıq cinayət məcəlləsi ilə təşkilatçılıq hesab olunur. O deyib ki, bu əməl Cinayət Məcəlləsinin (CM) 181-ci maddəsi ilə quldurluq hesab olunur və həmin maddənin təsiri dairəsinə düşür:

“Cinayət Məcəlləsinin 181-ci maddəsi quldurluqdur. Bu da o deməkdir özgənin əmlakını ələ keçirmə məqsədi ilə hücuma məruz qalmış şəxsin həyatı və sağlamlığı üçün təhlükəli zorakılıqla və ya zorakılıq tətbiq ediləcəyi hədəsi ilə bağlı olan basqındır. Əgər həqiqətən də belə bir hadisə bir qrup şəxs tərəfindən Vəfa Şərifovanın adamına qarşı törədilibsə, bu, CM-nin 181.2.1-ci maddəsi ilə tövsif olunacaq bir əməldir. Burada hər hansı bir silah və ya silah qismində əşyalardan istifadə olunarsa, artıq 181.2.5-ci maddənin təsir dairəsinə düşmüş olur. Bu əmələ görə, Cinayət Məcəlləsinin 181.2.1 və 181.2.5-ci maddələrinin təsir dairəsinə düşdükdə 8 ildən 12 ilə qədər azadlıqdan məhrumetmə cəzası təyin oluna bilər”.Hüquqşünasın sözlərinə görə, əgər şantaj və ya hədə-qorxu yolu ilə hansısa əmlakın ələ keçirilməsi motivi varsa, bu əməl CM-nin 182-ci maddəsinə uyğun tövsif olunacaq:

“Bu, Cinayət Məcəlləsinin 182-ci maddəsinə uyğun tövsif olunacaq. Əgər burada şəxs əvvəlcədən əlbir olmuş bir qrup şəxslə bu işi törədirsə və ya zor tətbiq etmə ilə törədildikdə CM-nin 182.2.1 və 182.2.3-cü maddələrinin tövsif dairələrinə düşür. Belə olduqda isə 5 ildən 10 ilə qədər azadlıqdan məhrumetmə cəzası təyin oluna bilər”.

Hüquqşünas deyib ki, iddialar özünü doğruldarsa, Şəbnəm Tovuzlu həbs oluna bilər:

“Burada Şəbnəm Tovuzlunun təşkilatçılığından söhbət gedir. CM-nin 32.3-cü maddəsinə görə, cinayətin törədilməsini təşkil edən, cinayətin törədilməsinə rəhbərlik edən şəxs cinayətin təşkilatçısı hesab olunur. Qeyd olunan 181 və 182-ci maddəni törədən şəxslər tərəfindən ilkin ifadələr alındığı zaman təsdiq olunarsa ki, onlar Ş.Tovuzlunun tapşırığı əsasında hərəkət ediblər, o zaman Şəbnəm Tovuzlu da həmin şəxslər qədər cinayət məsuliyyəti daşıyır. Onun da əməli CM-nin müvafiq maddələri ilə törədilmiş cinayətə görə təyin olunacaq cəzanın 4/3-dən az olmamaq şərti ilə azadlıqdan məhrumetmə cəzasına cəlb olunacaq”.