Almaniya müdafiə naziri “Leopard 1A5”i Rusiyaya qarşı effektiv silah adlandırıb
05 may 2023 18:23 (UTC +04:00)
“Leopard 1A5” tankları yeni deyil, lakin effektivdir və ukraynalılara Rusiya təcavüzünə qarşı vuruşmağa yardım edəcək”.

Bunu Almaniya müdafiə naziri Boris Pistorius danimarkalı həmkarı Troels Lund Poulsen ilə birlikdə Almaniyadakı Klietz təlim bazasını ziyarət edərkən jurnalistlərə açıqlamasında deyib.

“Bəziləri onların köhnə tanklar olduğunu deyəcək, lakin bu tanklar hələ də effektivdir və döyüşə hazırdır. Onlar hazırda geniş istifadə edilən və bir çox tərəfdaşlar tərəfindən göndərilmiş Rusiya istehsalı “T72S” tanklarından daha yenidirlər”, - deyə Pistorius bildirib.

Almaniyalı nazir ölkəsinin Danimarka və Niderland ilə birlikdə 100 ədəd “Leopard 1A5” tankının modernizasiya və təmirini maliyyələşdirdiyini xatırladıb. Əlavə edib ki, Klietz təlim bazasında Danimarka tərəfindən Ukrayna Silahlı Qüvvələrinə bağışlanmış “Leopard 1A5” tanklarının idarə edilməsi ilə bağlı ukraynalı hərbçilərə təlimlər keçilir və tezliklə burada daha bir qrup ukraynalı hərbçiyə “Marder” PDM-lərinin istifadəsi üzrə təlimlərə başlanılacaq.