İsrailin milli təhlükəsizlik naziri Itamar Ben Gvir HƏMAS-la atəşkəsin əleyhinədir.

O deyir ki, hökumət vasitəçilər tərəfindən dünən elan edilmiş atəşkəs razılaşmasını təsdiqləsə, rəhbərlik etdiyi Otzma Yehudit Partiyası koalisiyanı tərk edəcək.

Ben Gvir mətbuat konfransında bildirib ki, İsrailin yüzlərlə fələstinli məhbusu azad etməsi Qəzzada terror qruplarının reabilitasiyasına imkan verəcək.

"Yüzlərlə terrorçu qatil azad ediləcək, qəzzalılardan ibarət minlərlə terrorçunun zolağın şimalına qayıtmasına icazə veriləcək", - deyə o xəbərdarlıq edib.

Bundan əlavə, o qeyd edib ki, İsrail-Qəzza- Misir sərhədi boyunca Filadelfi dəhlizindən çəkiləcək, bununla da, müharibədə bugünəqədərki "bütün nailiyyətlərini" itirəcək.

O həmçinin xəbərdarlıq edib ki, hazırkı razılaşma Qəzzada saxlanılan bütün girovların azad edilməsini ehtiva etməyəcək.

"Bu da ölüm müqaviləsinə daxil olmayan qalan girovların taleyini möhürləyir", - o iddia edib.

Ben Gvir ifrat sağçı nazir Bezalel Smotrichin Dini Sionizm Partiyasının üzvlərini və Baş nazir Binyamin Netanyahunun Likud Partiyasının "ideoloji" üzvlərini sazişə qarşı çıxmağa çağırıb.