Almaniya Prezident Administrasiyasının rəhbəri, Dövlət katibi Dörte Dinger Azərbaycandan üzr istəyib.

Buna səbəb Almaniya prezidenti Frank-Valter Ştaynmayerin sosial media səhifəsində keçmiş Dağlıq Qarabağ ərazisində de-fakto fəaliyyət göstərmiş hökumətin bayrağı olan postun paylaşılması olub.

“Post texniki səhv üzündən dərc olunub və Almaniyanın Azərbaycanın ərazi bütövlüyünə dair bilinən mövqeyi ilə bağlı heç bir əhəmiyyət daşımır. Mən bu səhvə görə olduqca məyusam. Postun Azərbaycanda bəzi insanlar arasında yaratdığı yanlış təəssürata görə üzr istəyirəm”, Dinger Azərbaycan prezidentinin köməkçisi Hikmət Hacıyevə ünvanladığı məktubda qeyd edib.

Ötən gün Almaniyanın Azərbaycandakı səfiri Ralf Horlemann Xarici İşlər Nazirliyinə çağırılmış və ona Ştaynmayerin postu ilə bağlı etiraz edilmişdi.

İnsident Ştaynmayerin Ermənistana səfər etdiyi günə təsadüf edib. O, Ermənistan prezidenti ilə görüşü zamanı Ermənistanın Avropa İttifaqına qoşulmaq marağından “şad olduğunu” bildirib. Ştaynmayer, həmçinin, Yerevanda “erməni soyqırımına” həsr olunan abidəni ziyarət edib və ölkənin digər rayonlarına da səfəri gözlənilir.

Almaniya prezidenti aprelin 2-də Bakıya səfər edəcək.

Lakin, onun Bakı səfəri yalnız 1 gün çəkəcək.

Martın 30-da isə Almaniyanın dövlət kanalı olan “Deutsche Welle”də “Ermənistanın Qafqazda torpaq və kimlik uğrunda mübarizəsi” başlıqlı sənədli film yayımlanıb. Filmdə Azərbaycanın erməniləri 2023-cü sentyabrında Dağlıq Qarabağdan qovduğu, 2020-ci il müharibəsini isə Türkiyə və İsrailin hesabına qazandığı deyilir.