Misir mətbuatının yaydığı məlumata görə, Böyük Britaniyanın “HMS Queen Elizabeth” adlı qabaqcıl təyyarədaşıyan hərbi gəmisi bu həftə Süveyş kanalından keçərək Yaxın Şərqə doğru hərəkət edib. Gəminin əsas istiqamətinin İran körfəzi bölgəsi olduğu bildirilir.

Gəmi, bölgədə artan gərginlik fonunda Britaniyanın regional təhlükəsizlik və sabitlik siyasətinə dəstək məqsədilə göndərilib. Məlumatlara görə, gəmiyə döyüş təyyarələri və helikopterlər də daxil olmaqla çoxsaylı hava və dəniz qüvvələri müşayiət edir.

Misir liman idarəsindən bildirilib ki, “Queen Elizabeth”in Süveyş kanalı boyunca keçidi zamanı xüsusi təhlükəsizlik tədbirləri görülüb və kanalın bəzi hissələrində müvəqqəti hərəkət məhdudlaşdırılıb.

Bölgə üzrə ekspertlər bu addımı İranın nüvə proqramı və Hürmüz boğazında gəmilərin təhlükəsizliyi ilə bağlı narahatlıqların fonunda atılmış siyasi və hərbi siqnal kimi dəyərləndirirlər.

Rəsmi London hələlik gəminin konkret tapşırığı və missiyası ilə bağlı açıqlama verməyib, lakin Müdafiə Nazirliyi daha öncə bildirib ki, “Queen Elizabeth” Böyük Britaniyanın dəniz gücünü nümayiş etdirmək və müttəfiqlərlə birgə təlimlərdə iştirak etmək üçün bölgəyə göndərilir.