Bu gün, iyulun 23-də Bakı Apellyasiya Məhkəməsində ictimai fəal Anar Abdullanın inzibati həbslə bağlı verdiyi şikayətə baxılıb. Məhkəmə onun apellyasiya şikayətini təmin etməyərək, Binəqədi Rayon Məhkəməsinin çıxardığı qərarı qüvvədə saxlayıb. Məlumatı “Abzas Media”ya Anar Abdullanın yaxınları verib.

Xatırladaq ki, Anar Abdulla iyulun 11-də İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələbinə tabe olmamaq) maddələri ilə təqsirli bilinərək 30 sutka inzibati qaydada azadlıqdan məhrum edilib.

O, məhkəmədə bildirib ki, iyulun 11-də Bakının Atatürk prospektində, ictimai nəqliyyatdan düşən zaman saxlanılıb və heç bir inzibati qanun pozuntusuna yol verməyib.

Anar Abdulla eyni zamanda Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli ilə birgə cinayət işi üzrə də təqsirləndirilən şəxs qismində tanınıb. O, qaçaqmalçılıq da daxil olmaqla səkkiz maddə ilə maliyyə cinayətlərində ittiham olunur. Hazırda onun barəsində polis nəzarətinə vermə qətimkan tədbiri seçilib.

2023-cü ilin noyabr ayından etibarən Azərbaycanda media və vətəndaş cəmiyyətinə qarşı son on ilin ən genişmiqyaslı həbslərindən biri baş verib. Müstəqil jurnalistlər, hüquq müdafiəçiləri və ictimai fəallar müxtəlif cinayət işləri üzrə istintaqa cəlb olunublar.

Həbs edilən şəxslər ittihamları qəbul etmir, onların siyasi motivli olduğunu bildirirlər. Hüquq müdafiəçilərinin son hesabatlarına əsasən, hazırda ölkədə 370-dən çox siyasi məhbus var. Azərbaycan hakimiyyəti isə bu iddiaları rədd edir, ölkədə insanların siyasi baxışlarına görə təqib olunmadığını bildirir.