AXCP sədri Əli Kərimli Varşava Təhlükəsizlik Forumuna dəvət alıb. Bu barədə redaksiyamıza AXCP-dən məlumat daxil olub.

Varşava Təhlükəsizlik Forumu Avropanın ən nüfuzlu təhlükəsizlik konfranslarından biridir. Forum transatlantik əməkdaşlığın gücləndirilməsi, həmçinin Mərkəzi və Şərqi Avropanın təhlükəsizlik və müdafiə problemlərinin müzakirəsi üçün təsis edilib. Hər il keçirilən bu Forumda 100-dək ölkənin hökumət və vətəndaş cəmiyyəti nümayəndələri iştirak edir.

Kazimir Pułaski Fondunun təsis etdiyi Forum NATO, Polşanın Milli Təhlükəsizlik Bürosu və Polşa Prezident Administrasiyası ilə strateji tərəfdaşlığa malikdir və onun təşkilində Polşanın Xarici İşlər və Müdafiə nazirlikləri iştirak edir. ABŞ-ın Marşall Fondu da Forumun təşkilatçılarından biridir.

AXCP sədrinin Foruma qatıla bilməsi problemlidir. Çünki Azərbaycan hakimiyyəti 2006-ci ildən bəri ona xaricə çıxış üçün vacib olan ümumvətəndaşlıq pasportu verməkdən imtina edir. Bununla bağlı Avropa Məhkəməsi və Avropa Şurası Nazirlər Komitəsinin Əli Kərimlinin xeyrinə olan qərarlarını da Azərbaycan hakimiyyəti icra etmir.