Avropanın aparıcı ölkələri – Almaniya, Fransa və Böyük Britaniya ABŞ-dan asılı olmayan müdafiə sistemi qurmaq üçün yeni təhlükəsizlik tərəfdaşlığı yaradıb. Bu barədə The New York Times məlumat yayıb.

Məlumata görə, Almaniyanın müxalifət lideri Fridrix Mers, Fransa Prezidenti Emmanuel Makron və Böyük Britaniyanın yeni Baş naziri Kir Starmer ABŞ-ın mümkün çəkilməsi fonunda Avropanın hərbi təhlükəsizliyini öz üzərinə götürmək qərarına gəliblər.

Trampsız NATO mümkünmü?

Yeni təşəbbüsün yaranmasına səbəb ABŞ-da Donald Trampın prezidentliyə qayıtmaq ehtimalı və onun NATO-ya münasibətidir. Tramp dəfələrlə Alyansdan çıxmaq niyyətində olduğunu bildirmiş, onun vitse-prezidenti Cey Di Vens isə Avropanı açıq şəkildə tənqid etmişdi.

Məsələyə münasibət bildirən Londonlu təhlükəsizlik eksperti Lourens Fridman qeyd edib:

“Bu, ABŞ-a qarşı addım deyil. Avropa ölkələri artıq öz qərarlarını qəbul edib, məsuliyyəti bölüşməlidirlər”.

Müdafiə sənədləri imzalanır

Keçən həftə Fridrix Mers və Kir Starmer Londonda “Kensinqton müqaviləsi” adlanan sənədi imzalayıblar. Müqavilə təhlükəsizlik, iqtisadi əməkdaşlıq və siyasi tərəfdaşlığı əhatə edir.

Bundan əvvəl Starmer və Makron nüvə silahlarının koordinasiyası barədə də razılıq əldə etmişdilər. May ayında isə üç liderin Ukraynaya birgə səfəri bu yeni ittifaqın mesajı kimi qiymətləndirilir.

Parisdə qərargah: Ukraynaya dəstək davam edir

Hazırda Parisdə “istəklilərin koalisiyası” formatında yeni hərbi qərargahın qurulduğu bildirilir. Bu qərargahın məqsədi ABŞ-ın iştirakı olmadan Ukraynaya yardımı koordinasiya etmək və eyni zamanda mümkün atəşkəs ssenarilərini müzakirə etməkdir.

Polşa yeni ittifaqın açar ölkəsi ola bilər

Hərbi ekspert Tomas K. Tayner isə hesab edir ki, bu ittifaqda Polşanın rolu həlledici olacaq:

“Avropada real müdafiə xətti Fransa, Almaniya və Polşanı əhatə etməlidir. İkinci xətt İtaliya, Türkiyə və Skandinaviya ölkələrindən keçməlidir. Polşanın Hərbi Hava Qüvvələri zəifdir, bu baxımdan Almaniya və Fransa ona texniki dəstək verməlidir”.

Yeni paktın gələcəkdə digər Avropa ölkələrini də əhatə etməsi istisna olunmur.