Müstəqillik əldə etdiyi gündən Azərbaycan dövləti qardaş Türkiyə Cümhuriyyəti ilə dostluq, qardaşlıq və əməkdaşlıq prinsipinə əsaslanan münasibətlərinin inkişafına xüsusi önəm verir, bu münasibətlərə mane olmağa calışanların qarşısını qətiyyətlə alır. Təəsüf ki, bu münasibətlərə xələl gətirmək istəyənlər qüvvələr hələ də mövcuddur. Belə şəxslərin hər iki dövlətin rəsmi strukturlarında mövqe tutması, onların öz bədxah əməllərinin gercəkləşməsinə imkan yaradır.

Yalan, şər və böhtan kampaniyasından istifadə edərək gizli məqsədlərini ört basdır etməyə calışan, qardaş xalqlar arasında nifaq yaradan bu qüvvələrə qarşı mübarizə günün tələbidir.

Dövlətlər arasında diplomatik əlaqələrin ali prinsiplər əsasında qurulmasında, etimad hissinin artırılmasında fövqaladə və səlahiyyətli səfirlərin rolu böyükdür. Təmsil etdiyi dövlətin maraq və mənafeyini qoruyan səfir, eyni zamanda çalışdığı dövlətin qanunlarına, adət-ənənələrinə böyük hörmət nümayiş etdirməklə, xalqlar arasında dostluq əlaqələrinin möhkəmlənməsinə çalışmalıdır. Bunun əksini görmək məyusedici olardı.

Bir necə gün öncə tanınmış ictimai xadim, vəkil Aslan İsmayılovun “Türkiyə kimi qüdrətli bir dövlətin səfiri sanki Əli Həsənovun köməkçisi kimi davranırdı, onun bütün tədbirlərində, hətta ailə tədbirlərində belə iştirakını çox önəmli sayırdı” fikri həqiqətən bir çox suallar doğurur.



Vəkil Aslan İsmayilov yazır: “Əli Həsənovun bu basabasda Türkiyəyə getməsi barədə fikirlərimi Sizinlə də bölüşürəm. Bu gedişi əsla onun xəstəliyi ilə əlaqələndirmirəm. Əgər olsa belə, axı illərdir Ə.Həsənovun xalqa üfürdüyü analoqu olmayan səhiyyəmiz, özünün müalicəsi üçün şəxsi klinikası var. Həmin “Xətai” Estetik Klinikası ki, 8 yaşlı ailənin tək övladı xırda əməliyyatdan sağ çıxmadı, sonra da bu cinayəti ört-basdır elədilər. Hesab edirəm ki, bu səfərin köklərini, çoxlarına qəribə gəlsə də, onun Türkiyə səfiri Erkan Özoralla çox yaxın münasibətlərində axtarmaq lazımdır”.

İllər öncə də Azərbaycanda çalışmış, xalqımız tərəfindən hörmət və ehtiram görmüş bir diplomatı belə bir insanlar ilə əlaqələrdə suçlamaq həqiqətən maraqlı məsələdir. Təbii ki, Əli Həsənov ilə səfirin münasibətləri isti ola bilər, cünki Prezident Administrasiyasının ictimai-siyasi şöbəsinin rəhbəri kimi Əli Həsənov bəzi səfirlər ilə görüşürdü, hətta bəzən onları Bakıdan kənarda olan evinə də dəvət edirdi. Lakin bu münasibətlərin Əli Həsənovun şəxsi maraqlarının həyata keçirilməsi üçün istifadə edilməməsindən əmin ola bilərik mi?

Düşünmək istərdik ki, səfir Erkan Özoralın diplomatik bilgiləri bu proseslərdə manipulyasiyanı real vəziyyətdən ayırmağa imkan verirdi.

Hazırda gördüyümüz kimi Əli Həsənov ilə cənab səfirin münasibətləri ölkədə ictimaiyyət tərəfindən də aydın müşahidə edilir, birmənalı qarşılanmır və geniş müzakirələrə səbəb olurdu. Cünki Əli Həsənovun yüksək mövqeyi, əlində olan geniş media imkanları, onları müdafiə edən vasitəyə çevrilmişdir. Bu illər ərzində Türkiyə-Azərbaycan münasibətlərinə xələl gətirən neçə-neçə zərərli ideyalar Əli Həsənovun tabeçiliyində olan media qurumları vasitəsilə tirajlanmışdır.

Əli Həsənov bütün bu illər ərzində vəzifə səlahiyyətlərindən istifadə edərək, FETÖ ilə əlaqəli olan şəxslərin himayəçisinə cevrilmiş və Azərbaycandakı fəaliyyətləri üçün münbit zəmin yaratmışdır. FETÖ-ya bağlı müxtəlif qurumlar və şəxslər öz növbələrində Əli Həsənovun ailə biznesinin yaradıcıları və şərikləri olaraq ona öz borclarını ödəmişlər.

Professor Əli Həsənovun bu gün Azərbaycanda və Azərbaycandan kənarda mövcud olan biznes şəbəkələrinin maddi-texniki təchizatı, infrastrukturu, kadr potensialı, konsalting xidməti FETÖ-nun himayəsində olan qurumlar tərəfindən formalaşdırılıb. Hazırda Azərbaycan mətbuatında və sosial şəbəkələrdə Əli Həsənovun çox saylı mülkiyyətlərinin, şirkətlərinin mənbəyini araşdırarkən FETÖ ilə işbirliyi ortaya cıxır.

2009-2013-ci illər ərzində hazırda FETÖ işinə görə Türkiyədə həbsdə olan “Samanyolu TV”-nin rəhbəri Hidayət Karaca Azərbaycana dəfələrlə səfər etmiş və hər dəfə Əli Həsənov onu şəxsən müşayiət etmişdir. Bakının Fətəli xan Xoyski küçəsi 98 ünvanında yerləşən Xankəndi restoranında keçirilən görüşlər və müzakirələr zamanı bəhs edilən mövzuların hansı məqsədə xidmət etməyi artıq məlumdur.

Zaman göstərdi ki, Əli Həsənovun “təqdimatı” ilə qardaş Türkiyə qarşısında ittiham etdiyi bir sıra iş adamlarının, ictimai xadimlərin və rəsmilərin FETO ilə əlaqəli hər hansı bir bağlantısı aşkar edilməmişdir. Əksinə, bu şəxslər AK Parti siyasətinə hörmət bəsləyən, AK Parti millət vəkilləri ilə əməkdaşlıq edən, beynəxalq tədbirlərdə Türkiyənin mövqelərini dəstəkləyən və hər iki ölkəyə fayda verə biləcək insanlardır.

Əli Həsənovun ötürdüyü “kompromat” yazıların məzmunu artıq bəllidir. Əli Həsənovun tabeliyində olan şəxslər tərəfindən hazırlanan arayışlar Əli Həsənovun nəzarətində olan saytlara sızdırılırdı. Əli Həsənovun məqsədi - Azərbaycan rəhbərliyində yanlış rəy formalaşdıraraq müxtəlif insanlardan küllü miqdarda pul almaq və ya onları öz inhisarında olan siyasi-iqtisadi sahələrdən uzaqlaşdırmaq idi.

Azərbaycanda 2016-cı ildən etibarən FETÖ terror qruplaşmasına təəsübkeşlik edən qurumlara və şəxslərə qarşı təcrid etmə, fəaliyyətini dayandırma, həmçinin həbs etmə, ekstradisiya və digər effektiv metodlar tətbiq edilmişdir. Bununla yanaşı, hətta 2016-ci ilədək Azərbaycanda FETÖ ilə hər hansı bağlantısı olan resurs qalmamış, və rəsmi Bakı bu qətiyyətli mövqeyi ilə Türkiyə Cümhuriyyətinin rəhbərliyinin yanında olduğunu dəfələrlə bəyan etmişdir. Belə qənaətə gələ bilərik ki, cənab səfir Azərbaycan dövlətinin və dövlət başcısının bu addımlarını görür və alqışlayır!

2014-cu ildə Azərbaycanda FETÖ ilə iş birliyində ittiham olunan qurumlar dərhal bağlanarkən, bu şəbəkə qarşılıqlı razılaşma nəticəsində bəzi müəssisələrini, və infrastrukturunu Əli Həsənovun və ailəsinin mülkiyyətinə verdi. Bu proses həmin vaxtı Milli Təhlükəsizlik naziri olmuş Eldar Mahmudovun razılığı olmasaydı baş tuta bilməzdi.

Nəticədə, “Kaspi” liseylərinin və uşaq bağcalarınını sürətlə genişlənməsi, Xəzər TV, Xəzər FM, 100.5 FM, Araz FM radiolarının inkişafı, “Kaspi” hazırlıq kursları, “Xətai” klinikası və estetik mərkəzlərin, və sairə çox saylı müəssisələrin yaranmasına gətirib çıxardı. Bu böyük sərvətin sahibləri olan Əli Həsənov ailəsinin nəzarətsiz böyüməsinə keçmiş Milli Təhlükəsizlik Naziri Eldar Mahmudovun bir müddət himayə etməsi şübhə doğurmur. Eldar Mahmudov və Əli Həsənovun bu kimi əməllərinə Prezident İlham Əliyev tərəfindən layiqli hüquqi qiymət verilib.

Türkiyənin “Samanyolu” televiziyasının Azərbaycan bürosunun maddi texniki bazasında yaranmış Xəzər TV-yə ilk kredit FETÖ işinə görə bağlanmış Bank Asya tərəfindən verilib. Əli Həsənov ailəsinin yaxın adamı, Moskvada təhsil alarkən dostlaşdığı Asəf Hacıyev kanalın ilk təsisçisi olur. Asəf Hacıyev bir zamanlar Bakıdakı Gülən məktəblərindən olan Bakı Türk Kolejində tarix dərsi deyir (sonralar Asəf Hacıyev ictimaiyyətə təqdim etdiyi tərcümeyi halından bu bölməni çıxarmışdır) eyni zamanda Əli Həsənova aid olan Beynəlxalq Mətbuat Mərkəzinə rəhbərlik edirdi. Xəzər TV-nin rəhbəri Hüseyn Dinləməz ilə razılaşmalar nəticəsində əldə olunan külli miqdarda pul, vergidən yayınma halları kimi rəsmi faktlar, bank hesabları, da mediada geniş dərc edilən mövzular arasındadır və bu gün bütün Azərbaycan vətəndaşlarına məlumdur.
(http://suveren.az/li-hsnov-xzr-tv-y-nec-sahib-oldu-v-yaxud-hr-ay-prezidentin-komkcisin-300-350-min-manat-odyn-huseyn).

Əli Həsənovun və ailə üzvlərinin vergi borcları artıq araşdırılır.

"Xəzər" telekanalına rəhbərlik Əli Həsənovla Hüseyin Dinləməz arasında razılaşmaya əsasən Əli Həsənovun oğlu Şamxal Həsənova ötürülüb. Sirr deyil ki, Şamxal Həsənov Bakıda bağlanan Gülən məktəblərindən olan Qafqaz Gimnaziyasının məzunudur. Şamxal Həsənov atasının razılığı ilə bu günə kimi axtarışda olan FETÖ mənsubları ilə əməkdaşlığını davam edir.

Azərbaycanda FETÖ-çulara qarşı ciddi mübarizə şəraitində FETÖ-çuların gizlədilməsi, məsuliyyətdən yayındırılması, Azərbaycanı rahat tərk edə bilməsi asan məsələ deyildi. Bu proses Azərbaycanın Milli təhlükəsizlik naziri Eldar Mahmudovun köməyi olmadan gercəkləşə bilməzdi.

Dövlətin FETÖ-çulara qarşı mübarizəsinə rəğmən keçmiş Milli təhlükəsizlik naziri Eldar Mahmudov öz vəzifə səlahiyyətlərindən sui-istifadə edərək, Əli Həsənovun vasitəçiliyi ilə FETÖ şəbəkəsinin rəhbər üzvlərinin Azərbaycanı tərk etməsinə imkan yaratdı.

Eyni zamanda, Eldar Mahmudov Əli Həsənov ilə birgə bir sıra şəxslər haqqında uydurma arayışlar hazırlayaraq, yalançı faktları düzüb-qoşaraq ölkə rəhbərliyinə yalan bilgilər təqdim etmişdirlər.

Azərbaycan və Türkiyə mətbuatına FETÖ ilə əlaqəsi olmayan insanlarla əlaqədar məntiqi əsası olmayan məqalələr ötürülməsi isə diqqəti yayındırma məqsədi daşıyırdı.

Qeyd etmək istərdik ki, Prezident Administrasiyasında Əli Həsənovun rəhbərlik etdiyi şöbədə Media və informasiya ilə əlaqələr sektorunun müdiri Cəmaləddin Quliyev (Həsənoğlu) idi. Əli Həsənovun sadiq kadrlarından olan Cəmaləddin Quliyev bir zamanlar Fətullah Gülənin Azərbaycanca şəxsi web səhifəsində köşə yazarı idi:

https://fgulen.com/az/component/content/article/748-fgulen-com-azerice-azerbaycan-dili/metbuat/kose-yazilari/36077-cemaleddin-hesenoglu-publika-az-turk-dilini-beynelxalq-dil-etmek-cehdi

Cəmaləddin Quliyev mediada əsl FETÖ üzvlərini qorumaq üçün iz azdırma kampaniyasında Əli Həsənova sədaqətini nümayiş etdirirdi.

2016-ci il 15 iyul dövlət çevrilişinə cəhd hadisəsindən sonra aşağıdakı şəxslər Azərbaycanı tərk edərək Türkiyə istintaqından yayınmağa müvəffəq oldular:

1. Ənvər Özərən – Çağ Öyrətim Şirkətinin prezidenti

2. Əhmət Sanıç – Qafqaz Universitetinin rektoru

3. Hüseyn Dinləməz – Xəzər TV-nin prezidenti

4. Halil İbrahim Seyhan - Bürc FM radiosunun prezidenti, Xəzər TV-nin vitse prezidenti

5. Mustafa Saatçı – Dialoq Avrasiya Platformasının Azərbaycandakı rəhbəri

Əli Həsənov hətta bu gün adları FETÖ işlərində hallandırılan və Gülən şəbəkəsinin üzvü olan şəxslərlə əməkdaşlıq etməkdən cəkinmir. Hüseyin Dinləməz Azərbaycanı tərk edib Avropaya yerləşdikdən sonra Əli Həsənov – Gülən şəbəkəsinin ortaqlığı barədə sükutun müqabilində özünün əsas adamlarından olan və o zaman yanında çalışdırdığı Gökhan Özkundakçını Xəzər TV-yə və ona bağlı radio kanallara Reklam Müdiri təyin edilməsi şərtini irəli sürür. Tələb yerinə yetirilir və Gökhan Özkundakçı reklam müdiri təyin edilmişdir.

Qeyd edək ki, bu şəxs Türkiyədə FETO işinə görə bağlanılan Samanyolu Televiziyasının reklam koordinatoru Mehmet Özkundakçının qardaşı idi. Gökhan Özkundakçı reklam müdiri təyin edildikdən sonra kanal və radiolarda maliyyə axınlarını nəzarəti tam ələ keçirmək üçün ondan öncə kanalda reklam müdiri olaraq çalışan Süleyman Məmmədov Xəzər Televiziyasından uzaqlaşdırılır:

https://aqreqator.az/az/siyaset/509451

Gökhan Özkundakçı topladığı reklam gəlirlərinin hər ay artması barədə Əli Həsənovun həyat yoldaşı Sona Vəliyeva və Əli Həsənovun oğlu Şamxal Həsənova hesabatlar verir, özü və qardaşı Mehmet Özkundakçının Azərbaycanda olan bizneslərinin (Dulce dərmanları – www.dulce.az, Bioform çayları, Məcun – Oynaq ağrıları əleyhinə kremlər) Xəzər kanalında pulsuz reklam olunmasına nail olurdu.

Bütün bu faktlar bir daha sübüt edir ki, Əli Həsənov Türkiyə-Azərbaycan münasibətlərinə zərbə vurmaqla yanaşı, eyni zamanda öz oyunlarına hər zaman müxtəlif şəxsləri salmaq məqsədi güdürdü. Bu baxımdan, ictimai xadimlərin narahatçılığı məhz cənab Səfirin Əli Həsənov ilə müşahidə edilən dostluğundan irəli gəlirdi. Lakin, əminik ki, Türkiyə kimi böyük dövlətin səfiri hər zaman yaxşını pisdən ayırmağa qadir olduğu kimu, manipulyasiya cəhdini də real işdən asanlıqla ayırırdı.

Nəticədə, Azərbaycan Prezidenti İlham Əliyevin qətiyyətli siyasəti və barışmaz mövqeyi nəticəsində öz vəzifə səlahiyyətlərindən sui-istifadə edənlər, dövlətinə, xalqına xəyanətkar mövqedə duranlar layiqli cəzasını aldılar.

“Demokrat.az”