Ümumdünya Səhiyyə Təşkilatı COVID-19-un beynəlxalq narahatlıq doğuran ictimai səhiyyə fövqəladə vəziyyəti (PHEIC) statusunun bitdiyini bəyan edib.

Foto.info.az CNN-ə istinadən xəbər verir ki, ÜST-ün Beynəlxalq Fövqəladə Səhiyyə Tənzimləmələri Komitəsinin 15-ci iclasında COVID-19 pandemiyası müzakirə edilib.

Qeyd olunub ki, təşkilatın Baş katibi Tedros Adhanom Gebreyesus komitənin COVID-19-un beynəlxalq narahatlıq doğuran ictimai səhiyyə fövqəladə vəziyyəti statusunun ləğv edilməsi təklifi ilə razılaşıb.

“Bir ildən çoxdur ki, pandemiya azalma trendi göstərib. Bu trend bir çox ölkələrə COVID-19-dan öncəki həyata qayıtmaq imkanı verib. Dünən fövqəladə vəziyyət komitəsi 15-ci dəfə görüşüb və mənə tövsiyə edib ki, mən beynəlxalq narahatlıq doğuran ictimai səhiyyə fövqəladə vəziyyətinin bitdiyini elan edim. Mən tövsiyəni qəbul etmişəm.

Böyük ümidlərlə mən COVID-19-un qlobal səhiyyə üçün fövqəladə vəziyyət olmasının bitdiyini elan edirəm”, - Gebreyesus mətbuat konfransında deyib.

Qeyd edək ki, ÜST-ün beynəlxalq narahatlıq doğuran ictimai səhiyyə fövqəladə vəziyyəti (PHEIC) elan etməsindən sonra ölkələr təşkilatın tövsiyələrinə riayət etmək öhdəliyi daşıyırlar. Eyni zamanda, hər bir ölkə özünün milli fövqəladə səhiyyə vəziyyətini bəyan edir.