Yunanıstanın ərazi sularında göyərtəsində 750 nəfər qeyri-leqal miqrant olan balıqçı gəmisi batıb.

Kiçik gəmiyə 750 nəfərin minməsi onun batmasının əsas səbəblərindəndir. Yunanıstanın sərhəd mühafizə xidməti yalnız 104 nəfərin həyatını xilas edə bilib, faciədə 646 nəfər həyatını itirib.

Xilas edilənlər arasında qadınlar və uşaqlar yoxdur. Çünki, əsasən Suriya, Misir və Pakistandan olan miqrantlar "mentalitet gərəyi" qadınları və uşaqları gəminin qapalı yerlərində saxlayırlarmış, gəmi sürətlə batdığı üçün onları açıb buraxan olmayıb.

Gəmi Yunanıstan sularında günlərcə qalıb, ancaq sərhəd mühafizə xidməti onu qəbul etməyib. Son günlər gəminin içməli su və qida ehtiyatı tamamilə tükəndiyindən yunanlar təchizat qayıqları ilə gəmiyə içməli su və qida çatdırıblar, ancaq gəminin sahilə yan almasına imkan verməyiblər.

Bunu bilə-bilə insanlar ölümü gözə alaraq günlərlə açıq dənizdə, normadan artıq yüklənmiş və hər an batmaq riski ilə üz-üzə olan balıqçı gəmisində qalıb dəniz suyunu içməyi öz ölkələrinə qayıtmaqdan üstün tutublar.

Avropa Birliyinin üzv dövlətləri bu günlərdə qurumun Niderlandda keçirilən toplantısında miqrasiya siyasətini sərtləşdirməklə bağlı özlərinin "tarixi" adlandırdıqları qərarı razılaşdırıblar.

Qərar gələn ilin əvvəlində qüvvəyə minəndən sonra qeyri-leqal miqrantlara münasibət çox sərtləşəcək və dövlətlər dərhal qaçqınları öz ölkələrinə və ya ərazisindən yola çıxdıqları tranzit ölkələrinə qaytaracaqlar.

Suriya, Misir və Pakistandan olan insanlar bu dirənişi öz ölkələrini avtoritarizmdən qurtarmaq, normal həyat qurmaq üçün göstərsəydilər, bu mübarizəni, fədakarlığı, inadkarlığı öz vətənlərində sərgiləsəydilər indi dənizin dibində deyil, həyatda idilər.