Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi İşçi Qrupu 2023-cü ilin yanvar-iyun ayları ərzində narkomanlığa və narkotik vasitələrin, psixotrop maddələrin və onların prekursorlarının qanunsuz dövriyyəsinə qarşı mübarizənin nəticələrinə dair məlumat yayıb.

Məlumata görə, bu istiqamətdə cari ilin yanvar-iyun ayları ərzində hüquq-mühafizə orqanları 5881 cinayət faktı aşkarlayıb. Bu cinayət işlərinin 2048-i narkotik vasitələrin qanunsuz satışı, 3638-i narkotik vasitələrin qanunsuz əldə edilib saxlanılması ilə bağlıdır.

Aşkarlanmış faktlar üzrə qanunsuz dövriyyədən ümumilikdə 4 ton 623 kiloqram narkotik vasitıə müsadirə olunub. Bu həcmdə narkotik vasitənin 1 ton 517 kiloqramı heroin, 2 ton 510 kiloqramı marixuana, 193 kiloqramı tiryək və s. narkotik vasitələr olub.

Həmçinin göstərilən dövr ərzində 38418 ədəd həb metadon, 8476 ədəd çətənə bitkisi, eləcə də 3 kq 153,268 qr, 7631 ədəd kapsul və 953 ədəd həb güclü təsir edən maddə və 40,682 qr prekursor qanunsuz dövriyyədən götürülüb.

Bundan əlavə, 147 ton 477 kiloqram yabanı halda bitmiş narkotik tərkibli bitkilər məhv edilib.

Bəhs edilən dövrdə narkotik vasitələrin qanunsuz dövriyyəsilə bağlı 4277 nəfər cinayət məsuliyyətinə cəlb edilib. Bunların 4179 nəfəri kişi, 98 nəfəri qadınlar olub.

Cinayət məsuliyyətinə cəlb edilmiş şəxslərdən 49 nəfəri xarici ölkə vətəndaşlarıdır.

Narkotik vasitələrin və psixotrop maddələrin qaçaqmalçılıq yolu ilə ölkə ərazisinə gətirilməsi ilə bağlı 142 fakt aşkar edilib. Həmin faktlar üzrə ümumi çəkisi 1 ton 959 kq metadon və s. qanunsuz dövriyyədən çıxarılıb.

Bu ilin yanvar-iyun ayları ərzində qanunsuz dövriyyədən götürülmüş 4 ton 623 kq narkotik vasitələrin və psixotrop maddələrin ümumi dəyəri 219 milyon 430 min AZN təşkil edir.