Fevralın 17-də Bakı Ağır Cinayətlər Məhkəməsində ötən il Müsavat Partiyasının üzvü Natiq Mehdini qətlə yetirməkdə təqsirləndirilən 55 saylı orta məktəbin təsərrüfat müdiri Elsevər İslamovun məhkəməsi davam edib.

Hakim Elmin Rüstəmovun icraatında olan işdə bu dəfə şahidlər dindirilib.

Məhkəmə hadisənin baş verdiyi məktəbin direktoru Yaqut Kərimlini dindirib.

Həm öldürülən, həm də təqdsirləndirilən şəxs həmin məktəbdə işləyiblər.

Məktəb direktoru məhkəməyə verdiyi ifadəsində göstərib ki, hadisə qeyri-iş günündə baş verib.

Növbəti gün işə gələndə Natiq Mehdini işdə görməyib: “Məktəbin qapısı açıq idi, düşündüm ki, Natiq özü qapını açıq qoyub, gedib. Təsərrüfat müdiri Elsevər İslamovdan bu barədə soruşanda dedi ki, Natiq onun zənglərinə cavab vermir. Sonra Natiqin bacısı oğlu məktəbə gəldi, dedi ki, Natiq dayısı işdən evə qayıtmayıb, ailəsi narahat qalıb. Biz də öz növbəmizdə polisə zəng vurduq, gəldilər, məktəbin ərazisindəki təhlükəsizlik kameralarının görüntülərinə baxdılar, Elsevər İslamovu özləriylə apardılar”.

Məhkəmənin və müdafiə tərəfinin suallarını cavablandıran şahid həm ölənin, həm də öldürməkdə təqsirləndirilənin problem yaratmayan, sakit adam olduqlarını deyib: “Natiq axşam növbəsində işləyirdi. Elsevər arada şikayətlənirdi ki, Natiq yatır, məktəbin qapılarını gec açır. Mən də ona tapşırmışdım ki, bir də belə hal təkrarlansa Natiqdən izahat alsın. Elsevərlə bağlı bir də onu deyə bilərəm ki, əvvəllər anbarla bağlı sənədləri vaxtında vermədiyi üçün iki-üç dəfə töhmət alıb”.

Ötən məhkəmə iclasında Elsevər İslamov verdiyi ifadəsində bildirmişdi ki, hadisəni törədərkən spirtli içkinin təsiri altında olub. Onun sözlərinə görə, hadisədən əvvəl yaxın dostu ilə bir kafedə yemək yeyib, spirtli içki qəbul edib. Kafedən çıxıb məktəbə gedərkən qapıları açıq, dəhlizlərdəki işıqları söndürülməmiş, Natiq Mehdini isə stulda yatmış vəziyyətdə görüb. Zarafat üçün şəklini çəkib. Bu anda Natiq ayılıb və şəklini çəkdiyi üçün onunla kobud danışıb və söyüş söyüb. O da Natiqdən nəyə görə məktəbin qapılarını açıq qoyaraq yatdığını soruşub. Aralarında mübahisə yaranıb: “Ağır söyüşlər söyürdü, yerə yıxıb təpiklədim. Qaldırıb stula oturdanda yenə söydü, başına yumruq vurdum, huşunu itirdi. Xırıldadı, sonra hərəkətsiz qaldı, nəbzi vurmurdu. Səhərə yaxın məktəblilər gəlib meyiti görməsin deyə, maşınıma qoymaq istədim, yerləşmədi. Məcbur oldum ki, onu bıçaqla hissələrə ayırım. Qara paketə yığıb məktəbin pilləkənlərinin altında gizlətdim. İki gün sonra məktəbdə DİM imtahan keçirəcəkdi deyə qapılara plomb vurulacaqdı, məktəbə heç kim buraxılmayacaqdı. Onun üçün elə həmin gün günorta heç kim olmayanda paketi götürüb apardım”.

Bu iş üzrə məhkəmə martın 5-də davam edəcək.

Qətl hadisəsi ötən ilin may ayında, Bakının Xətai rayonu ərazisində, 55 saylı orta məktəbdə baş verib. 1964-cü il təvəllüdlü Natiq Mehdinin itkin düşməsi barədə polisə daxil olmuş müraciət üzrə araşdırma aparılıb.

Natiq Mehdi (Ulubəy) Müsavat Partiyasının fəallarından olub.

O, son qurultaydan əvvəl partiya başqanlığına namizədliyini irəli sürüb. İsa Qəmbər namizədliyini verdikdən sonra namizədliyini geri götürüb.

Onun qətlin üstü açılandan bir neçə gün əvvəl maşını ilə itkin düşdüyü bildirilib.

Qətllə bağlı Elsevər İslamova Cinayət Məcəlləsinin 120.2.4-cü (Xüsusi amansızlıqla və ya ümumi təhlükəli üsulla adam öldürmə), 245-ci (Qəbir üzərində təhqiredici hərəkət) və 309.2-ci (Vəzifə səlahiyyətlərini aşma, zor tətbiq etməklə və ya zor tətbiq etmə hədəsi ilə törədildikdə, yaxud silah və digər xüsusi vasitələrdən istifadə etməklə törədildikdə və ya ağır nəticələrə səbəb olduqda) maddələri ilə ittiham elan olunub.