Orman Tağızadə əqli geriliyi olan uşaqlar üçün nəzərdə tutulmuş uşaq evinin məzunudur. Tərtər rayonunda qeydiyyatda olsa da, Bakı küçələrində qalır. Onun əlilliyi olan anası və bacısı da Bakı küçələrində dilənçilik edib parklarda yaşayır.

Bu barədə Axar.az-a daxil olan məlumatda bildirilir ki, O.Tağızadənin 1 saylı psixonevroloji sosial xidmət müəssisəsinə yerləşdirilməsi ilə bağlı Sosial Xidmətlər Agentliyinə müraciət olunub. Lakin Agentlikdən bildirilib ki, O.Tağızadə əvvəlcə əlilliyini bərpa etməlidir. O.Tağızadənin bu məsələ ilə məşğul olmaq imkanı məhduddur.

Məsələ ilə bağlı Sosial Xidmətlər Agentliyinin İctimaiyyətlə əlaqələr və kommunikasiya şöbəsindən saytımıza verilən açıqlamada qeyd olunub ki, Orman Mehman oğlu Tağızadənin psixi və yüngül formalı əqli pozuntuları ilə əlaqədar əlilliyi təsdiq edən sənədi olmadığı üçün aidiyyəti üzrə psixonevroloji sosial xidmət müəssisəsinə yerləşdirmək mümkün olmayıb:

“Vətəndaş Agentliyin xidmət kontingentinə daxil olmadığı üçün əməkdaşlarımızın dəstəyi ilə Dövlət Tibbi Sosial Ekspertiza və Reabilitasiya Agentliyinə yönləndirilərək müvafiq müayinəyə cəlb olunmasına dəstək göstərilib. Orman Tağızadəyə sentyabrın 2-də Tibbi Sosial Ekspert Komissiyası tərəfindən əyani baxış keçiriləcək. Vətəndaşın hazırki vəziyyətinə uyğun olaraq əlilliyi qiymətləndiriləcək. Müvafiq əllillik dərəcəsi təyin olunacağı təqdirdə vətəndaş Agentliyin psixonevroloji sosial xidmət müəssisəsinə yerləşdiriləcək”.

Qeyd edilib ki, Agentliyin tabeliyindəki psixonevroloji sosial xidmət müəssisələrində psixi və yüngül formalı əqli pozuntuları ilə əlaqədar əlilliyi yaranan, əlilliklə əlaqədar özünəqulluq qabiliyyəti, habelə ona qulluq və kömək edə biləcək əmək qabiliyyətli qohumları və ya qanuni nümayəndələri olmayan 18 yaşdan yuxarı şəxslərə stasionar formada sosial xidmətlərin göstərilməsi, onların sosial reabilitasiyasının həyata keçirilməsi ilə bağlı fəaliyyət həyata keçirilir.