Azərbaycan Prezidenti İlham Əliyevin qızları Leyla və Arzu Əliyevaların Türkiyədə lüks otel layihəsinə 500 milyon avro sərmayə yatırdığı xəbəri geniş müzakirələrə səbəb olub.

Türkiyənin nüfuzlu “Sözcü” qəzetinin yaydığı məlumata görə, Əliyeva bacılarının səhmdar olduğu “Pasha Holding” şirkəti Bodrum bölgəsində yerləşən beşulduzlu “Mandarin Oriental Bodrum” kurort kompleksinin 50% səhmini əldə edib. Sazişin ötən il “Paşa Holding”in baş icraçı direktoru Cəlal Qasımov və layihənin əvvəlki sahibi “ASTAŞ” şirkətinin rəhbəri Vedat Aşçı arasında imzalandığı bildirilir.

Vedat Aşçı açıqlamasında bu əməkdaşlığı yüksək dəyərləndirib:
“Belə uğurlu bir layihənin sərmayəçisi olmaqdan qürur duyuram. Bodrumun dünya jet-set məkanları arasında yer almasına ciddi töhfə verdik. ‘Pasha Holding’ ilə qurduğumuz bu gözəl ortaqlığın ölkəmizə və turizm sektoruna böyük dəyər qatacağına inanıram,” – deyə o bildirib.

2014-cü ildə istifadəyə verilmiş “Mandarin Oriental Bodrum” kompleksi 132 ultra-lüks villadan ibarətdir. Hər bir villanın qiyməti 8-15 milyon avro arasında dəyişir.

Məsələ Türkiyə ictimaiyyətində və mediada ciddi rezonans doğurub. Tanınmış jurnalist Cüneyt Özdemir özünün “YouTube” kanalındakı verilişində sərmayə mənbəyi ilə bağlı sual qaldıraraq ironiya ilə deyib:
“Heç kim bu mövzuya toxunmur. Qoy biz də toxunmayaq. Yəqin ki, Azərbaycanda prezident yaxşı maaş alır və pul yığıb otelin 50%-ni ala bilir. Mən Azərbaycan xalqının bu cür rifah içində yaşamasına, məmurlarına dəyər verməsinə sevindim.”

Hazırda Azərbaycan tərəfindən məsələ ilə bağlı rəsmi açıqlama verilməyib. Sosial mediada isə bu sərmayənin mənbəyi və şəffaflığı ilə bağlı suallar artmaqdadır.