Azərbaycan hüquq-mühafizə orqanları Özbəkistan prezidenti Şavkat Mirziyoyevin ünvanına təhqir və ya böhtan atmaqda ittiham olunan, 43 yaşlı Özbəkistan vətəndaşı Amonbek Yusupovu Daşkəndə ekstradisiya edib. Bu barədə iyulun 25-də Baş Prokurorluq rəsmi məlumat yayıb.

Məlumata görə, Yusupov 2025-ci ilin aprel ayında Azərbaycan ərazisində saxlanılıb və barəsində beynəlxalq axtarış elan olunmuşdu. O, Özbəkistan Cinayət Məcəlləsinin 158.3-cü maddəsi – “Prezidentin ünvanına açıq təhqir və ya böhtan” ittihamı ilə məsuliyyətə cəlb olunur.

Baş Prokurorluq bildirir ki, ekstradisiya prosesi “Mülki, ailə və cinayət işləri üzrə hüquqi yardım və hüquqi münasibətlər haqqında” 1993-cü il Minsk Konvensiyasına əsasən həyata keçirilib. Yusupov Ədliyyə Nazirliyinin Penitensiar Xidmətinin xüsusi konvoyunun müşayiəti ilə Özbəkistanın səlahiyyətli orqanlarına təhvil verilib.

Qeyd edək ki, Özbəkistan qanunvericiliyinə 2021-ci ilin martında edilən dəyişikliklə prezidentin ünvanına təhqir və böhtana görə cinayət məsuliyyəti sərtləşdirilib. Müvafiq maddəyə əsasən, təqsirli şəxs üç ilədək islah işləri, azadlığın məhdudlaşdırılması və ya beş ilədək müddətə azadlıqdan məhrumetmə cəzası ala bilər.