USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Abzas Media”nın həbsdəki qadın əməkdaşları ictimaiyyətə müraciət edib: “Su verilməməsi ilə bizə təzyiq göstərilir”
Aclıq aksiyasının 4-cü günündə Bakı İstintaq Təcridxanasında saxlanılan “Abzas Media”nın qadın əməkdaşları — Sevinc Vaqifqızı, Nərgiz Absalamova və Elnarə Qasımova ictimaiyyətə müraciət ediblər. Onlar təcridxanadakı ağır şərait, su qıtlığı və təzyiqlərlə üzləşdiklərini bildiriblər.
Müraciətdə deyilir ki, aclıq aksiyasına başladıqdan sonra qadınların saxlandığı korpusa demək olar ki, su verilməyi dayandırılıb:
“Səhər və axşam cəmi yarım saat su verilir. Bu müddətdə 153 qadın nə yuyuna, nə qab-qacağını təmizləyə, nə də su qablarını doldura bilir. 23 iyulda isti su verilməli idi, amma bu hüququmuz da əlimizdən alındı”.
Onlar bildirirlər ki, təcridxanada temperaturun yüksək olduğu bir vaxtda, üçmərtəbəli korpusda 350-dən çox məhbus az qala bir ovuc suya möhtacdır:
“Bizim aclıq aksiyamız bəhanə gətirilərək digər dustaqlara da su verilmədiyini deyirlər. Bununla bizi digər məhbusların üzərinə qaldırmaq istəyirlər”.
“Abzas Media” əməkdaşları baş verən haqsızlıqlara görə birbaşa Prezident İlham Əliyevi məsuliyyətli saydıqlarını bildiriblər:
“Bu işgəncələr, bu şərait, bu məqsədli təxribatlar onun icazəsi olmadan baş vermir. Başımıza gələcək hər cür təhlükəyə görə onu məsuliyyətli biləcəyik”.
Aclıq aksiyasının tələbi
22 iyuldan etibarən Sevinc Vaqifqızı, Nərgiz Absalamova və Elnarə Qasımova müddətsiz aclıq aksiyasına başlayıblar. Onlar “Abzas Media”nın həbsdə olan direktoru Ülvi Həsənlinin Bakı İstintaq Təcridxanasına qaytarılmasını tələb edirlər.
Ülvi Həsənli artıq 6 gündür aclıq edir. Ailəsinin məlumatına görə, o, 21 iyulda cərimə kamerasına salınıb və səhhəti getdikcə ağırlaşır.
Rəsmi münasibət yoxdur
Məsələ ilə bağlı Penitensiar Xidmət hələlik heç bir açıqlama verməyib. Ombudsman Aparatı və digər insan haqları qurumları isə bu müraciətə necə reaksiya verəcəklər, naməlum olaraq qalır.
İctimaiyyət, yerli və beynəlxalq hüquq-müdafiə təşkilatları hadisəni diqqətlə izləyir və baş verənlərlə bağlı şəffaf araşdırma tələb olunur.
