USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Abzas Media”nın qadın jurnalistləri aclıq aksiyasını dayandırıblar
Həbsdə olan “Abzas Media” jurnalistləri Sevinc Vaqifqızı, Nərgiz Absalamova və Elnarə Qasımova iyulun 28-də aclıq aksiyasını dayandırdıqlarını açıqlayıblar. Onlar bu qərarı səhhəti pisləşən valideynlərinin vəziyyətinə görə verdiklərini bildiriblər.
Jurnalistlərin müraciətində qeyd edilir: “Hər birimizin valideyni ürək-damar problemlərindən əziyyət çəkir. Bizim aclıq dönəmimizdə onlar tez-tez xəstəxanaya müraciət etməli olublar. Onların səhhətini nəzərə alaraq aclığı dayandırırıq”.
Aclıq aksiyasını davam etdirən “Abzas Media” direktoru Ülvi Həsənliyə də müraciət edən jurnalistlər, onun da ürək xəstəliyindən əziyyət çəkən anasını nəzərə alaraq aclığı dayandırmasını xahiş ediblər.
Xatırladaq ki, Ülvi Həsənli iyulun 20-dən müddətsiz aclıq aksiyasına başlayıb. O, bu addımı Penitensiar Xidmətin məhkəmə qərarlarını icra etməməsinə etiraz olaraq atdığını bəyan edib. Həsənlinin vəkili Zibeydə Sadıqovanın müraciəti əsasında Bakı Ağır Cinayətlər Məhkəməsi onun Bakı İstintaq Təcridxanasına köçürülməsi ilə bağlı qərar çıxarsa da, bu qərar hələ də icra edilməyib.
Aclıq aksiyası həm də Həsənliyə dəstək məqsədilə iyulun 22-də digər jurnalistlər tərəfindən başladılmışdı.
İyunun 20-də Bakı Ağır Cinayətlər Məhkəməsində çıxarılan hökmə əsasən, “Abzas Media” direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və iqtisadçı-jurnalist Fərid Mehralızadə 9 il, Nərgiz Absalamova və Elnarə Qasımova 8 il, koordinator Məhəmməd Kekalov isə 7 il 6 ay azadlıqdan məhrum ediliblər. Onlar qaçaqmalçılıq da daxil olmaqla bir neçə maddə üzrə ittiham olunublar.
Lakin jurnalistlər və onların hüquq müdafiəçiləri ittihamların əsassız olduğunu və istintaqın inandırıcı sübutlar ortaya qoya bilmədiyini bildirirlər.
