Fransa prezidenti Emmanuel Makron bəyan edib ki, ölkəsi 2025-ci ilin sentyabrında BMT Baş Assambleyasının sessiyası çərçivəsində Fələstini rəsmi olaraq dövlət kimi tanıyacaq.

Bu barədə o, iyulun 24-də “X” sosial şəbəkəsində paylaşım edib. Makron bildirib:

“Dərhal atəşkəs əldə olunmalı, bütün girovlar azad edilməli və Qəzza əhalisinə irimiqyaslı humanitar yardım göstərilməlidir. HƏMAS silahsızlaşdırılmalı, Qəzzada təhlükəsizlik və bərpa təmin edilməlidir. Nəhayət, Fələstin dövləti qurulmalı və onun həyat qabiliyyəti təmin edilməlidir. Alternativ yoxdur.”

Fransa lideri həmçinin Fələstin Muxtariyyətinin rəhbəri Mahmud Abbasa ünvanladığı məktubun surətini də yayımlayıb.

ABŞ və İsrailin sərt reaksiyası

Makronun bu açıqlaması Vaşinqton və Təl-Əviv tərəfindən kəskin tənqid olunub.

ABŞ dövlət katibi Marko Rubio deyib:

“Bu məsuliyyətsiz qərar sadəcə HƏMAS-ın təbliğatına xidmət edir və sülh prosesini gecikdirir. Bu, 7 oktyabr hadisələrinin qurbanlarına qarşı təhqirdir.”

İsrailin baş naziri Benyamin Netanyahu isə Fransa rəhbərinin qərarını belə şərh edib:

“Belə bir addım terroru mükafatlandırır və Qəzzada olduğu kimi, daha bir İran marionetinin yaradılması riskini artırır. Gəlin açıq danışaq: fələstinlilər İsrailin yanında dövlət istəmirlər, İsrailin yerində dövlət istəyirlər.”

Fələstinin statusu

Hazırda BMT-yə üzv 193 dövlətdən təxminən 150-si Fələstin dövlətinin müstəqilliyini tanıyır. ABŞ və İsrail isə bu tanınmanı rədd edirlər.

Fələstin 2012-ci ildən etibarən BMT-də müşahidəçi dövlət statusuna malikdir. 2024-cü ilin mayında BMT Baş Assambleyasında keçirilən səsvermədə Fələstinin hüquqları genişləndirilib və onun tam üzv qəbul olunması dəstəklənib.