Bakı Ağır Cinayətlər Məhkəməsi xaricdə yaşayan bloger İmaməddin Əlimanovun cinayət işi üzrə hökmünü elan edib. Məhkəmə prosesinə hakim Hüseyn Hüseynli sədrlik edib.

İmaməddin Əlimanov “YouTube” platformasında yayımlanan “Xalq TV” kanalının təsisçisidir. O, hazırda ölkə hüdudlarından kənarda yaşayır və 2021-ci il mayın 27-dən axtarışda idi. Həmin tarixdə Binəqədi Rayon Məhkəməsinin qərarı ilə onun barəsində qiyabi həbs qətimkan tədbiri seçilmişdi.

Bu ilin mart ayında isə Baş Prokurorluq xaricə mühacirət etmiş bir sıra şəxsləri müxtəlif cinayət işləri üzrə istintaqa çağırmış, daha sonra isə onların bəziləri barəsində qiyabi məhkəmə qərarları çıxarılmışdı.

Məhkəmənin bu gün keçirilən son iclasında İmaməddin Əlimanova qiyabi hökm oxunub. Hökmə əsasən, bloger Cinayət Məcəlləsinin 12.1 və 281.2-ci maddələri (dövlət əleyhinə yönələn açıq çağırışlar - təkrar törədildikdə) ilə təqsirli bilinərək 7 il müddətinə azadlıqdan məhrum edilib.

İmaməddin Əlimanovun hazırda hansı ölkədə olduğu rəsmi olaraq açıqlanmayıb.