Azərbaycanda vəkil-müvəkkil münasibətləri ilə bağlı daha bir qalmaqallı şikayət ictimailəşib. 17 saylı Cəzaçəkmə Müəssisəsində saxlanılan məhbus Elvin Allahverdiyev Prezident İlham Əliyevə müraciət edərək, onu təmsil edən vəkilin aldadıcı vədlərlə ondan 10 500 manat aldığını, lakin nə vəd edilən hüquqi nəticənin əldə edildiyini, nə də düzgün müdafiə aparıldığını bildirib.

Müraciət tanınmış jurnalist Arzu Abdullanın “Facebook” səhifəsində yayıldıqdan sonra geniş rezonans doğurub və “İşgəncələr Əleyhinə Araşdırmalar Mərkəzi” tərəfindən də ictimaiyyətə təqdim olunub.

“1 il 6 ay deyildi, 3 il həbs verdilər”

Elvin Allahverdiyev yazır ki, 2023-cü ilin aprelində narkotik ittihamı ilə saxlanılıb və ailəsi onun hüquqlarını müdafiə etmək üçün Azərbaycan Vəkillər Kollegiyasının üzvü Elvin Əliyevlə müqavilə bağlayıb. Vəkil ailəyə 10 500 manat müqabilində cəzanın 1 il 6 ay olacağına söz verib. Lakin nəticədə Bakı Ağır Cinayətlər Məhkəməsi ona 3 il azadlıqdan məhrumetmə cəzası verib.

Şikayətçi iddia edir ki, vəkil müqavilədə rəsmi olaraq daha az məbləğ göstərərək vergidən yayınıb, məhkəmə proseslərində isə “can yandırmadığını” sübut etdiyini bildirib.

Şikayətdən sonra hüquq müdafiəçisinə cinayət işi açıldı

Müraciət ictimailəşdikdən sonra “İşgəncələr Əleyhinə Araşdırmalar Mərkəzi”nin rəhbəri Fikrət Cəfərli Vəkillər Kollegiyasının sədri Anar Bağırov tərəfindən CM-nin 147.1-ci maddəsi (böhtan) ilə xüsusi ittiham qaydasında məhkəməyə verilib.

29 iyul 2025-ci il tarixində Binəqədi Rayon Məhkəməsində, hakim Zamiq Bağırovun sədrliyi ilə iş üzrə son məhkəmə prosesi keçirilib. Prosesin nəticəsi hələ açıqlanmayıb, lakin müşahidəçilər hakimin real cəza istiqamətində qərar verəcəyini ehtimal edir.

Məqsəd: təkcə pulu yox, ədaləti geri almaq

Elvin Allahverdiyev müraciətində bildirir ki, məqsədi yalnız maddi zərərin ödənilməsi deyil:

“Bu addım, Elvin Əliyev düşüncəsində olan digər vəkillərin yalan vədlərlə insanları aldatmasının qarşısını almağa yardımçı olar.”

Qarşı tərəfdən reaksiya yoxdur

Hazırda qarşı tərəf – vəkil Elvin Əliyev – məsələ ilə bağlı ictimai açıqlama verməyib. Onun mövqeyi əldə olunarsa, xəbər yenilənəcək.


Redaksiya qeydi: Bu cür şikayətlər vəkillərin fəaliyyətinə olan ictimai etimadın qorunması və şəffaflığın təmin olunması baxımından diqqətlə araşdırılmalıdır.