Tanınmış müğənni Nigar Camal sosial mediada ünvanına yazılmış tənqidi şərhə sərt cavab verib. Belə ki, sənətçi Fərqanə Qasımovanın ona ünvanladığı “Kəsmə yollarla önə getmək əlbəttə çox kolay, türk qardaşlarımız demişkən” şərhi müzakirələrə səbəb olub.

Nigar Camal bu fikirlərə cavab olaraq sosial media hesabında bunları yazıb:

“Kəsmə yol – başqasının kölgəsində ucalmaqdır. Mənim bu günədək sənətdə heç bir dəstəkçim olmayıb. Azərbaycanın adını ucaya qaldırmaqla tanınmışam. Bunu da uca Azərbaycan Dövləti hər zaman dəyərləndirib.”

Camal geyimi və azadlığı ilə bağlı tənqidlərə də münasibət bildirib:

“Bir qadının geyimi onun şəxsiyyətini və dəyərini müəyyən etmir. Mən səhnədə, qırmızı xalçada və həyatda özümü ifadə etməkdən çəkinmirəm. Çünki azadlığım və qadın olaraq seçimlərim heç kəsin hökmü ilə ölçülə bilməz. Hər bir qadın istədiyi kimi geyinə, gülə, sevinə və yaşaya bilər. Bunun üçün heç kimdən icazə almağa ehtiyacı yoxdur!”

Sənətçi həmçinin hicab və əməliyyat məsələlərinə də toxunub:

“Kölgəsində olduğunuz sənətkara hörmətim sonsuzdur. Amma hər bir halda mən olduğum kimi görünürəm. Hicablı olub, namaz qılıb, başqasına böhtan atmaq günahdır. Hicab taxıb, eyni zamanda bədənşəkilləndirmə əməliyyatı etdirmək də günahdır.”

Nigar Camal paylaşımını bu sözlərlə tamamlayıb:

“Hər kəs öz həyatı ilə məşğul olsa, yaxşı olar.”

Qeyd edək ki, bu açıqlama sosial şəbəkələrdə geniş rezonans doğurub və sənətçilər arasında fikir ayrılığını bir daha gündəmə gətirib.