Azərbaycan Boks Federasiyası (ABF) Serbiyanın Zlatibor şəhərində keçirilən məktəblilər arasında Avropa Çempionatında baş vermiş insidentə münasibət bildirib.

Federasiyanın mətbuat xidmətinin yaydığı açıqlamaya görə, final döyüşündən sonra rinqə daxil olaraq hakimi vurmağa cəhd edən azərbaycanlı məşqçi Hamza Avezovun hərəkəti idman etikasına ziddir. Federasiya onun bu davranışı ilə bağlı daxili təlimat və qaydalara uyğun tədbir görüləcəyini bəyan edib.

Açıqlamada həmçinin qeyd olunub ki, 75 kq çəki dərəcəsində çıxış edən Yusif Ağakişiyev və şimali makedoniyalı Viktor Maystroviç arasında keçirilən final döyüşündə hakim Stefan Subalevskinin qərəzli qərarı boksçumuzun təmiz qələbəsini əlindən alıb və onu çempionluqdan məhrum edib.

ABF qarşılaşmanı idarə edən hakimin məsuliyyətə cəlb olunması üçün aidiyyəti beynəlxalq qurumlara rəsmi müraciət göndərəcəyini də vurğulayıb.

Hadisə idman ictimaiyyətində geniş rezonans doğurub və ABF baş verənlərlə bağlı ictimaiyyəti məlumatlandırmağa davam edəcəyini bildirib.