Prezident İlham Əliyev Azərbaycanda süni adalarda kazino fəaliyyətinə icazə verən qanun dəyişikliyini təsdiqləyib. Bu barədə iyulun 29-da Prezidentin Mətbuat Xidməti məlumat yayıb.

Təsdiqlənmiş sənəddə qeyd olunur ki, Nazirlər Kabineti altı ay müddətində kazino oyunlarının təşkili və keçirilməsi ilə bağlı normativ hüquqi aktların təkmilləşdirilməsinə dair təkliflər hazırlayıb Prezidentə təqdim etməlidir.

Sözügedən dəyişiklik 2024-cü il mayın 7-də qəbul olunmuş “Xəzər dənizinin (gölünün) Azərbaycana mənsub olan bölməsində süni torpaq sahələrinin yaradılması haqqında” qanuna əsaslanır. Qanun süni torpaq sahələrində sahibkarlıq fəaliyyətinin hüquqi çərçivəsini müəyyənləşdirməklə yanaşı, orada kazino oyunlarının keçirilməsini də mümkün edir.

Xatırladaq ki, Azərbaycanda kazino fəaliyyəti 1998-ci ildə mərhum prezident Heydər Əliyevin sərəncamı ilə qadağan edilmişdi.

Kazinoların leqallaşdırılması məsələsi son aylarda yenidən gündəmə gəlib. 2024-cü ilin oktyabrında Rusiya vətəndaşı olan, əslən azərbaycanlı iş adamı və müğənni Emin Ağalarov (prezident İlham Əliyevin keçmiş kürəkəni) Nardaran qəsəbəsində inşa etdiyi “SeaBreeze” kurort kompleksində kazino açmaq istədiyini bildirmişdi. O, bu barədə rusiyalı jurnalist Kseniya Sobçaka verdiyi müsahibədə danışmış və hökumətin bu ideyanı nəzərdən keçirdiyini demişdi.

Bundan sonra hökumətyönlü media orqanlarında və Milli Məclisdə kazinoların qanuniləşdirilməsinin iqtisadi və turizm baxımından əhəmiyyətini əsaslandıran çıxışlar artmağa başladı.

Hazırda diqqətlər hökumətin hazırlayacağı normativ sənədlərə və bu fəaliyyətin hansı məhdudiyyətlərlə həyata keçiriləcəyinə yönəlib.