“Abzas Media”nın direktoru, hazırda həbsdə olan və iyulun 20-dən etibarən müddətsiz aclıq aksiyası keçirən Ülvi Həsənlinin səhhəti ilə bağlı narahatedici məlumatlar yayılıb. Onun həyat yoldaşı Rübabə Quliyevanın iyulun 26-da verdiyi məlumata görə, Həsənli karserdə huşunu itirməsinə baxmayaraq, yalnız 5 gün sonra müayinə edilib.

Quliyevanın sözlərinə görə, iyulun 25-də Ülvi Həsənlidən aldığı telefon zəngi zamanı onun səsi “çox zəif və halsız” gəlib. Həsənli bildirib ki, iyulun 21-də karserdə huşunu itirib, lakin bu barədə nəzarətçiyə xəbər verməsinə baxmayaraq, heç bir reaksiya verilməyib.

“Qan təzyiqi 140/100 olub, çəkisi 67 kiloqrama düşüb. Ülvi həkimə ürəyində problem olduğunu desə də, həkim bildirib ki, burada kardioqramma etmək mümkün deyil, icazə yoxdur”, – deyə Quliyeva bildirib.

O, həmçinin əlavə edib ki, isti havaya baxmayaraq, karserdə nəfəslik qəsdən bağlı saxlanılıb və bu, Həsənliyə qarşı əlavə bir cəza və təzyiq üsulu kimi qiymətləndirilir.

“Aclıq aksiyasına görə karserdə saxlanması bir yana, nəfəsliyin də qəsdən bağlanması işgəncədir. O, düşünür ki, səhhəti ilə bağlı ictimailəşmiş məlumatlara görə cəzalandırılır”, – deyə Quliyeva vurğulayıb.

Ülvi Həsənli həmçinin ona dəstək məqsədilə aclıq aksiyasına qoşulan Sevinc Vaqifqızı, Nərgiz Absalamova və Elnarə Qasımova üçün narahat olduğunu bildirib.

Aclıq aksiyası və köçürülmə qərarının icra olunmaması

Ülvi Həsənli aclıq aksiyasına Penitensiar Xidmətin məhkəmə qərarını icra etməməsi səbəbilə başladığını bəyan edib. Onun sözlərinə görə, Bakı Ağır Cinayətlər Məhkəməsi vəkil Zibeydə Sadıqovanın müraciəti əsasında 3 iyulda onu Umbakı həbsxanasından Bakı İstintaq Təcridxanasına (BİT) köçürmək barədə qərar qəbul edib. Lakin bu qərar hələ də yerinə yetirilməyib.

Aclıq aksiyasına cavab olaraq, iyulun 22-də BİT-də saxlanılan digər jurnalistlər – Sevinc Vaqifqızı, Nərgiz Absalamova və Elnarə Qasımova da həmrəylik məqsədilə aclığa başlayıblar.

“Abzas Media işi” üzrə hökmlər

Xatırladaq ki, iyunun 20-də Bakı Ağır Cinayətlər Məhkəməsində “Abzas Media işi” üzrə hökm oxunub. Məhkəmənin qərarına əsasən:
• Ülvi Həsənli, Sevinc Vaqifqızı, Hafiz Babalı və Fərid Mehralızadə – 9 il,
• Nərgiz Absalamova və Elnarə Qasımova – 8 il,
• Məhəmməd Kekalov – 7 il 6 ay azadlıqdan məhrum ediliblər.

Onlara qarşı qaçaqmalçılıq da daxil olmaqla bir neçə maddə üzrə ittiham irəli sürülüb. Lakin jurnalistlər və onların hüquq müdafiəçiləri ittihamların siyasi motivli və əsassız olduğunu bildirirlər.