Səid Dadaşbəyli 13 il 6 aylıq həbs cəzasını başa vuraraq azadlığa çıxıb. Mətbuatda şərti olaraq “Səid Dadaşbəylinin dəstəsi” adlandırılan cinayət işi 2007-ci ildə, Eldar Mahmudovun nazir olduğu günlərdə Milli Təhlükəsizlik Nazirliyində başlamışdı. Həmin dövrdə Səid Dadaşbəyli ilə bərabər 15 Azərbaycan vətəndaşı həbs alınmışdı. Bu haqda iş məhkəməyə gedib çıxana qədər ictimaiyyətə hər hansı bir açıqlama verilməmişdi, tutulanların yaxınlarına da hədə-qorxu gələrək danışmamağı tapşırmışdılar.

Məsələ haqda Azərbaycan ictimaiyyəti cinayət dosyesi Bakı Ağır Cinayətlər Məhkəməsinə göndəriləndən sonra xəbər tutdu. İşə “pambıqla baş kəsən” Ənvər Seyidov baxdı. Proses zamanı gənclərin təqsirli bilindikləri dövlət çevrilişinə cəhd, hakimiyyəti zor gücünə ələ alma və bu qəbildən olan ittihamların söz yığınağı, Mahmudovun müstəntiqlərinin uydurmasından başqa bir şey olmadığını hər kəs anlayırdı. Hakim Ənvər Seyidov da hər fürsətdə müttəhimlər kürsüsündə olan gənclərin yaxınlarına “övladlarınız günahsızdır, narahat olmayın, hər şey yaxşı olacaq” vədi verirdi. Sonda isə Ənvər Seyidov ittiham aktını hökmə köçürüb günahsız Azərbaycan vətəndaşlarını, gənc ailə başçılarını uzunmüddətli həbsə göndərməkdən çəkinmədi. Üstəlik, üzə çıxdı ki, Eldar Mahmudov da uzun-uzadı bir məktub yazıb, Səid Dadaşbəyli və digərlərini zərərsizləşdirdiyinə görə təşəkkür edib.

Əslində isə Səid Dadaşbəyli və onunla birgə həbs olunan 15 nəfərin əksəri bir-birini tanımırdı. Bu adamları birləşdirən bilik və bacarıqları, bir neçə dil bilmələri, birjalarda işləmək, pul qazanmaq vərdişləri olub.

Bu iş üzrə məhkum olunanların 7-si 2019-2020-ci illərdə azadlığa çıxıblar. İyulun 15-də Səid Dadaşbəyli ilə yanaşı daha bir nəfər cəza müddətini başa vurub. Hazırda Səid Dadaşbəyli ilə bərabər həbsə alınanlardan yalnız Ceyhun Əliyev həbsdədir.

Səid Dadaşbəyli ilə bərabər həbsdə olanların əksəriyyətinin valideynləri, yaxınları baş verən haqsızlıqlara dözməyərək xəstəlik tapıb, dünyalarını dəyişiblər, bəzilərinin ailələri dağılıb.

Bəs bu cür qurama, saxta cinayət dosyesi Eldar Mahmudovun nəyinə lazım idi?

“Səid Dadaşbəylinin dəstəsi” adı altında cinayət işi Azərbaycanda dövlət çevrilişi şousu idi. Guya ölkədə “dövlət çevrilişi baş verib” və bu əvvəlcə ittiham, sonradan isə hökmdə öz əksini tapıb. Günahsız cavanların həbsinə səbəb olan bu iş ovaxtkı MTN-in Antiterror Mərkəzi tərəfindən 2007-ci ildə qurulub. Bu işin sifarişinin haradan qaynaqlandığı barədə illərdir ki, mətbuatda mülahizələr irəli sürülür.

Gündəmdə olan versiyalar əsas bunlardır:

Qərb ölkələrindən dini ekstremizmlə və terrorizimlə mübarizə adı ilə müsəlman ölkələrinin güc strukturlarına, o cümlədən Azərbaycanın MTN Antiterror Mərkəzinə köçürülən pullarını doğrultmaq və əldə etmək üçündür. “WikiLeaks” saytının 2006-2007-ci ildə verdiyi məlumata görə, Qərbdən Azərbaycana təzyiqlər həmin dövrdə olunmuşdu ki, İrana qarşı öz ərazisində NATO-nun hərbi bazalarını yerləşdirməyə icazə versin. Qərbə bu işi qurmaqla sübut etmək lazım idi ki, NATO bazalarının yerləşdirilməsi İranmeylli yerli şiələrin aktivləşməsinə səbəb ola bilər və nəticədə böyük neft-qaz proyektləri təhlükənin altına düşə bilər.

Bəzi məlumatlara əsasən, ümumdünya “Forex” valyuta birjasının Azərbaycan filialı “Foreks-AZ” nazir Eldar Mahmudovun obyekti olub. “Səid Dadaşbəyli dəstəsi”nin işi üzrə məhkum olmuşların bəzisi o birjada müstəqil treyderlər kimi işləyirdilər. Birjanın müdiri və instruktorunun yanlış proqnozu nəticəsində böyük məbləğdə pul itirildi. Nəticədə telefonda və görüşdə onların yuxarıda göstərilən birja işçiləri ilə xoşagəlməz söhbətləri baş vermişdi. Birjadakı bu afyora qalmaqalı başqa treyderlərin öz pullarını birjadan çıxartmağına səbəb ola bilərdi. Nəticədə Bakıdakı “Foreks-AZ” iflas olardı. Ona görə narazı qalmış, başqa investorları agah etmək istəyən treyderləri təcili aradan götürmək lazım idi. Əlbəttə ki, birja bəhanəsi ilə yox, başqa bəhanə ilə. Bu səbəbdən Said Dadaşbəyli dəstəsinin işinin ssenarisi MTN-in otaqlarında cızılıb və həyata keçirilib.

Tutulan gənclər “Paintball” Oyunları Federasiyası proyektini həyata keçirmək üçün DİN idman cəmiyyətinin atıcılıq tirinə praktiki atıcılıq dərsləri almaq məqsədi ilə getmişdilər. Amma bizim övladlarımız 2006-cı ilin mayın 20-də televiziyada Bakıda “Paintball” federasiyasının reklamını görəndən sonra qərara gəldilər ki, bütün dərslər saxlansın. Çünki artıq onları kimsə qabaqlamışdı və onlardan qabaq həmin federasiyanı Beynəlxalq Əyləncə Mərkəzinin nəzdində, “Delfin” hotelində açmışdı. Atıcılıq tirində keçirilən nəzəri və praktiki dərsləri MTN müstəntiqləri nə qədər absurd olsa da “hakimiyyəti zorla ələ keçirmək və əlində saxlamaq” niyyəti ilə əlaqələndirməyə çalışırdılar. Paradoksal vəziyyət yaranmışdı: - hamı bilirdi ki, Azərbaycanda dövlət çevrilişi baş verməyib. Buna baxmayaraq, Eldar Mahmudovun dirijorluğu ilə 10 cavan həmin ittihamla 12-14 il müddətinə cəza çəkməyə məhkum olundular.

Səid Dadaşbəyli ilə həbsə alınanların əksəriyyəti qondarma ittiham üzrə həbs müddətini başa vurub.

Onların gəncliyini, onlara dəyən maddi və mənəvi zərərləri kim qaytaracaq? Eldar Mahmudovdan bu işin hesabını soran olacaqmı?
“Yeni Müsavat”