Rusiya Konstitusiya Məhkəməsinin sədri Valeri Zorkinin ölkədə ölüm hökmünün qaytarılmasını istisna etməyən kitabını müsbət qiymətləndirirəm. Bu, gələcək üçün doğru fikirdir.
Axar.az xəbər verir ki, bunu Rusiya Dumasının Təhlükəsizlik və korrupsiyaya qarşı mübarizə komitəsinin üzvü Sultan Həmzəyev deyib.
“Zorkin kitabında çox savadlı və düzgün şəkildə qeyd edir ki, qəsdən adamöldürmə hadisəsi olduqca cəmiyyətdə ölüm hökmünün yenidən qüvvəyə minməsi ehtimalı həmişə dəstəklənəcək. Pedofil-qatillər üçün edam cəzası olmalıdır. Mən hesab edirəm ki, bu, düzgün tədbirdir”, - Həmzəyev bildirib.
Deputatın sözlərinə görə, bu yaxınlarda rusiyalı ekspertlər sosial şəbəkələrdə sorğu keçirib. Nəticədə məlum olub ki, sorğuda iştirak edən 37 min rusiyalının 79%-i pedofillər üçün ölüm hökmünün qaytarılmasını dəstəkləyib.