Almaniya kansleri Fridrix Merts bildirib ki, Qərb ölkələri artıq Ukraynaya verdikləri silahların istifadəsinə dair məsafə məhdudiyyətlərini aradan qaldırıblar. Bu barədə o, mayın 26-da Almaniyanın ictimai televiziyasına verdiyi müsahibədə danışıb.

Kanslerin sözlərinə görə, Britaniya, Fransa, Almaniya və ABŞ daxil olmaqla, Qərb ölkələri Ukraynaya ötürülən silahların Rusiya ərazisindəki hərbi hədəflərə qarşı istifadə edilməsinə mane olmur: “Bu, o deməkdir ki, Ukrayna artıq, məsələn, Rusiyanın daxilində yerləşən hərbi mövqeləri vurmaqla özünü müdafiə edə bilər. Bir müddət əvvəl bu mümkün deyildi, indi isə mümkündür”.

Mertsin bu açıqlaması beynəlxalq miqyasda geniş rezonans doğurub. Kreml nümayəndəsi Dmitri Peskov məsafə məhdudiyyətlərinin ləğvini “çox təhlükəli addım” kimi qiymətləndirib və bunun Ukrayna ilə bağlı siyasi həll səylərinə zidd olduğunu vurğulayıb.

Qeyd edək ki, Almaniya ABŞ-dan sonra Ukraynanın ən böyük ikinci silah təchizatçısıdır. Fridrix Mertsin rəhbərlik etdiyi yeni Almaniya hökuməti Ukraynaya göndərilən silahların siyahısını əvvəlki kansler Olaf Şoltzun hökumətindən fərqli olaraq açıqlamamağa üstünlük verir. Bu siyasət “strateji qeyri-müəyyənlik” yanaşması ilə əsaslandırılır.

Bununla belə, Ukraynaya “Taurus” uzaqmənzilli raketlərinin verilib-verilməyəcəyi məsələsi hələ də açıq qalır. 500 kilometrə qədər mənzilə malik olan bu raketlərin ötürülməsi ilə bağlı hazırkı hökumət mövqe bildirməkdən çəkinir. Mertsin sələfi Şoltzun hökuməti bu silahların verilməsinə qarşı çıxmışdı, halbuki Merts o dövrdə müxalifət lideri kimi bu qərara qarşı çıxaraq “Taurus” raketlərinin göndərilməsini dəstəkləmişdi.