Şimali Koreya lideri Kim Çen İn 1 sentyabr 2025-ci il tarixində Pxenyanı xüsusi zirehli qatarla tərk edərək Çinə rəsmi səfərə yola düşüb. Bu barədə Cənubi Koreyanın Yonhap agentliyi mənbələrə istinadən məlumat yayıb.

Məlumata görə, Kim Çen İnin qatarı günorta saatlarında yola çıxıb və onun təxminən 20–24 saatlıq səfərin ardından 2 sentyabr günorta saatlarında Pekinə çatacağı gözlənilir.

Səfərin əsas məqsədi Çində İkinci Dünya Müharibəsində Qələbənin 80 illiyi münasibətilə təşkil olunan hərbi paradda iştirak etməkdir. Tədbirə həmçinin Çin Prezidenti Si Cinpin və Rusiya Prezidenti Vladimir Putin də qatılacaq. Bu, Kim Çen İnin son altı ildə ilk dəfə beynəlxalq çoxtərəfli tədbirdə iştirakı olacaq.

Şimali Koreya lideri səfərə çıxmazdan əvvəl ölkəsində yeni raket zavodunu ziyarət edərək hərbi sənaye potensialını şəxsən yoxlayıb.

Kim Çen İn ənənəyə sadiq qalaraq Çinə xüsusi zirehli qatarla səyahət edir. Qatarda yüksək təhlükəsizlik tədbirləri ilə yanaşı, lüks şərait də yaradılıb – yataq kupeləri, iş otaqları, restoran vaqonları və hətta zirehli nəqliyyat vasitələri üçün xüsusi bölmələr mövcuddur.

Ekspertlərin fikrincə, Pekində keçiriləcək tədbir Şimali Koreya, Çin və Rusiya arasında son aylarda daha da yaxınlaşan siyasi və hərbi əməkdaşlığın nümayişinə çevrilə bilər.