İndoneziya prezidenti Prabovo Subianto BMT Baş Assambleyasının Nyu-Yorkda keçirilən 80-ci sessiyasında çıxış edərək, ölkəsinin Qəzzaya 20 minədək sülhməramlı hərbçi göndərməyə hazır olduğunu bildirib.

Prezidentin sözlərinə görə, İndoneziya BMT-nin ən böyük sülhməramlı missiyalarında iştirak edən dövlətlərdən biri kimi “sülhə ehtiyac olan hər yerdə xidmət göstərməkdə davam edəcək”.

“Əgər Təhlükəsizlik Şurası və Baş Assambleya qərar qəbul edərsə, İndoneziya Qəzzada və ya Fələstinin digər bölgələrində sülhün bərpasına yardım məqsədilə 20 min və ya daha çox əsgər göndərməyə hazırdır. Məqsəd iki dövlətli həllin xəyaldan gerçəkliyə çevrilməsidir”, – deyə Subianto vurğulayıb.

O, həmçinin qeyd edib ki, zorakılıq siyasi münaqişələrin həlli vasitəsi ola bilməz:
“Zorakılıq yalnız yeni zorakılıq yaradır. BMT bu faciəni dayandırmaq üçün qəti mövqe sərgiləməlidir, əks halda dünya sonsuz müharibələr və artan zorakılıq təhlükəsi ilə üz-üzə qalacaq”.

İndoneziya lideri çıxışında ölkəsinin müstəmləkə keçmişinə də toxunaraq, xalqının ədalətsizlik və ayrı-seçkiliyin nə demək olduğunu yaxşı bildiyini xatırladıb.

Qeyd edək ki, 2023-cü ilin oktyabrında İsrailin başladığı hücumlar nəticəsində Qəzzada 65 mindən çox fələstinli, əsasən qadın və uşaqlar həlak olub. Davam edən bombardmanlar bölgəni yaşanmaz hala gətirib, aclıq və xəstəliklərin yayılmasına səbəb olub.